Recortes tapecíos na plantiya docente asturiana nel entamu de cursu 2024-25

De la que’l departamentu de comunicación de la conseyera Espina publica notes de prensa nes que presume d’inversión récord n’inclusión, siguen llegándonos denuncies a diariu dende numberosos centros educativos  tocantes a los retayos tapaos que se tán produciendo na plantiya educativa asturiana nesti entamu de cursu 2024-25. 

La “trampa” que decidió usar l’Alministración asturiana tien el so orixe nos retayos del primer mandatu de Mariano Rajoy, allá por 2012. Cuando, años dempués de los mesmos, y gracies a la movilización del profesoráu, se consiguiós por fin revertir parte d’estos retayos y volver a les 18 hores llectives pal profesoráu de Secundaria y FP, introducióse una clausa pola cual el profesoráu d’eses etapes podía cerrar los sos horarios hasta con un máximu de 21 hores llectives de forma escepcional, si les necesidaes del centru educativu asina lo riquíen. 

Agora, y d’un añu para otru, podría paecer que camudaron les necesidaes d’una amplia mayoría de centros de Secundaria asturianos. La realidá ye que la Conseyería d’Educación dio cola manera de retayar en personal de forma tapada, faciendo de la esceición norma, yá que tenemos noticies de decenes de centros educativos nos que la mayoría del profesoráu tien más de 18 hores llectives nel so horariu d’esti cursu. Ensin previu avisu, los equipos directivos tán atopándose con que se retayó personal de les sos necesidaes autorizaes de profesoráu. 

Esto repercute na calidá de la educación y na atención que recibe l’alumnáu asturiano, una y bones los docentes tenemos menos tiempu para coordinanos, preparar les nueses clases, axuntanos coles families o atender a la cada vez más creciente diversidá nes aules.

A Adrian Barbón y Lydia Espina enllénase-yos la boca falando de defensa de la escuela pública, pero los datos demuestren que cada entamu de cursu les coses van a peor. La falta de recursos ye la tónica xeneral na gran mayoría de los centros públicos asturianos, mientres un gobiernu que presume de progresista dedica a la educación concertada, nun se nos escaeza, más de 105 millones d’euros nos presupuestos d’esti añu 2024. 

Dende SUATEA esiximos que la cláusula de les 21 hores s’aplíque tal que ta redactada: de forma escepcional. Nun hai defensa posible de la escuela pública si nun va acompañada d’inversión.

Uviéu, 12 de setiembre de 2024