Campaña sobre la nueva FP: “Una implantación en riesgu”

SUATEA simula* una Evaluación de Prevención de Riesgos Llaborales a cuenta de la implantación de la Llei nueva de Formación Profesional y convoca xunto a los STEs una concentración de protesta’l 20 de mayu en Madrid.

SUATEA ficimos una encuesta ente docentes de Formación Profesional n’Asturies qu’evidencia problemes importantes a la hora implantar la llei nueva de FP. La muestra permite identificar tendencies clares y problemes recurrentes na implantación de la llei nueva.

Ente los datos más relevantes, el 97,9% del profesoráu afirma non disponer d’instrucciones clares, mentres que’l 100% valora negativamente la respuesta de l’Alministración, calificándola d’insuficiente, contradictoria o inexistente. Amás, el 75% del profesoráu denuncia una sobrecarga de trabayu, y el 68,1% reconoz que ta farto o desencantao cola situación actual.

Ún de los principales problemes detectaos ye la organización de la formación nes empreses: el 87,2% afirma que nun ta siendo fácil de xestionar, por cuenta la falta d’empreses disponibles, la burocracia o la
falta d’instrucciones clares.

La encuesta tamién asoleya un problema d’accesu y equidá educativa: el 60,4% del profesoráu tien alumnáu migrante ensin númberu de la Seguridá Social, y esto dificulta la so participación na formación nes empreses, ensin qu’esistan soluciones clares na mayoría de los casos.

La valoración global ye mui negativa: la llei algama un 1,78 de 5, y la so implantación un 2,1 de 5.

Algunos de los testimonios recoyíos na encuesta son:

• “Tamos expuestos a reclamaciones continues y siéntome totalmente abandonada”
• “Ye un experimentu fallíu”.
• “Primero l’alumnáu de grau mediu y superior conseguía’l carnet básicu de prevencionista cursando’l módulu de FOL, agora paez que non y va perder una certificación importante p’atopar un
  trabayu”.
• “Tenemos alumnáu de 2º al que quieren contratar les empreses n’acabando la formación pero nun pueden porque tienen que volver al centru educativu. Tinía que ser formación seguida al final del 2º cursu, como yera primero”.
• “Nun sabemos si acabamos en mayu o xunu, paez ser que cada centru va facelo d’una forma diferente”.

SUATEA, como integrante de los STEs, tenemos convocada una concentración de protesta contra la Llei nueva de FP, que va ser el 20 de mayu a las 18:30 en Madrid.

*El simulador ye una ferramienta mui utilizada na Formación Profesional pa familiarizase con maquinaria que nun hai en taller y facelo con aplicaciones informáticas. Nesti casu, la simulación d’una evaluación de riesgos llaborales ye un enfoque que permite analizar les condiciones nes que ta desenvolviéndose la llei nueva pa detectar riesgos organizativos, evalualos y prevenirlos, amás d’insistir na perda d’acreditación como Prevencionista Básicu del alumnáu que titule esti cursu. La conclusión ye qu’hai riesgos graves d’implantación qu’ataquen de trabayu, inseguranza y decepción al profesoráu.

Entra na Infografía interactiva que ficimos en Genially