Declaración pol reconocimientu vital y la visibilidá de la menopausia

Por una vida plena en toles nueses edaes

Dende la Organización de Muyeres de la Confederación Intersindical dirixímonos a la sociedá, a los sistemes de salú y a les instituciones públiques para esixir una tresformación radical na forma en qu’entendemos, acompañamos y valoramos la vida de les muyeres.

Mientres xeneraciones, una mirada patriarcal y reduccionista vien encasillando’l valor social de la muyer nun intervalu inxustamente estrechu: la mocedá y la capacidá reproductiva. Baxo esta lóxica, tolo qu’asocede antes tratóse como una mera preparación, y tolo que vien dempués, como una cayida invisible ya inevitable. Esta visión non solo distorsiona la nuesa identidá, degradándonos como seres humanos a un valor puramente de crianza sinón qu’acuta’l nuesu derechu a un desenvolvimientu personal continuu, dignu y prestosu a lo llargo de tola esistencia.

Nesti marcu de xusticia ya igualdá, la invisibilidá de la menopausia nun ye un fechu casual: ye la consecuencia directa del patriarcáu machista.

La menopausia foi arrastrada al terrén del tabú, la vergüenza y el silenciu precisamente porque señala’l fin de la etapa fértil. Tratala como un procesu secretu o una dolencia estigmatizada arrampla cola autonomía de les muyeres y atenta directamente contra la so calidá de vida. Por eso, llevantar la voz pola visibilidá de la menopausia nun ye solo una conversación sobro salú: ye un imperativu feminista, de derechos humanos y de xusticia social.

Frente al silenciu y la marxinación de la madurez femenina, manifestamos y esiximos:

• El valor intrínsecu de cada etapa vital: esiximos la reconocencia de la infancia, la mocedá, l’adultez, la transición hormonal y la vieyera como fases dafechu valioses por sí mesmes. Les muyeres nun esistimos en función de la nuesa fertilidá nin de los cánones de guapura xuveniles; la nuesa identidá medra colos años, sumando esperiencia, capacidá de lideralgu y soberanía sobro los nuesos cuerpos.
• Derechu a la salú integral con perspectiva de xéneru: reclamamos una atención médica que supere’l sesgu centráu casi puramente na maternidá. Esiximos investigación, diagnósticu y tratamientos calidable pa la salú hormonal, cardiovascular, ósea, mental y sexual en toles fases de la vida, garantizando que l’acompañamientu mientres la menopausia sía un derechu accesible y non un privilexu.
• Entornos llaborales y sociales llibres de discriminación: esiximos afayar les dinámiques de trabayu y comuñales a les necesidaes de cada momentu vital. Ye indispensable erradicar la discriminación por edá y xéneru que frena les carreres profesionales y invisibiliza’l talentu, la voz y l’aportación de les muyeres madures.
• Desmantelar la vergüenza y habitar el bientar: reivindicamos el derechu a nomar los nuesos procesos corporales ensin bocaos. La menopausia nun representa’l fin de la vitalidá, de la sexualidá nin del proyectu vital, sinón una transición natural que tien de vivise con dignidá, llibertá y plenitú.

Poner en valor cada ciclu de la nuesa vida ye defender el derechu a avieyar ensin perder derechos, espaciu nin relevancia. Convencíes de que lo personal ye político, llamamos a romper l’estigma, desmantelar el silenciu y asitiar la salú y el bientar integral de la muyer nel centru de l’axenda social y política con midíes qu’ayuden a visibilizar y normalizar cualesquier de les etapes vitales de les muyeres.

Nin invisibles, nin en silenciu: pol valor de toes nueses edaes y por una menopausia plena, informada y con derechos.