SUATEA denuncia la falta de mantenimientu nos colexos Rei Pelayo y Los Campos de Xixón

El sindicatu reclama al Conceyu responsabilidá y que nun se desentienda de les obres pa que nun tengan qu’intervenir los bomberos.

SUATEA denuncia la esmolición qu’hai nel Colexu Públicu Rei Pelayo de Xixón, onde, depués d’años d’obres, tresllaos y dificultaes pa recuperar la normalidá, una parte importante del edificiu sigue ensin rehabilitar y ensin usu definíu.

El 14 d’ochobre, l’agüa caltrió pa una parte del colexu, y llegó dende la cubierta hasta’l segundu pisu. La situación obligó a la Dirección del centru a solicitar la intervención de los bomberos.

Según la información treslladada al SUATEA, l’agua entró por cuenta la llena de los canalones. El profesoráu tien esmolición pol mantenimientu d’esta parte del edificiu, sobremanera pola falta de mantenimientu de la cubierta y de los árboles de fuera, que les sos cañes algamen hasta’l teyáu y pueden atascar los desagües.

Ye una zona que tien tres pisos, con cinco aules per pisu, que nun s’incluyó nel proyectu de rehabilitación. Nesa zona nun se reforzó’l forxáu como nes otres partes del colexu y anguaño nun tien usu educativu.

La comunidá educativa desconoz qué destín se cuenta dar a estes instalaciones y espresa la so esmolición pol so caltenimientu. Dende SUATEA consideramos imprescindible que se revise’l so estáu, se garantíce so mantenimientu y s’estúdie la posibilidá de recuperar estos espacios pa un usu educativu, cultural o comunal que beneficie al barriu.

Los Campos: otra reforma con cuestiones pendientes

Una situación asemeyada pasa nel Colexu Públicu Los Campos onde l’alumnáu tuvo que treslladase temporalmente a otru centru mientres se rehabilitaba’l cursu pasáu con un presupuestu de 5,25 millones d’euros, 3 d’ellos de financiamientu européu.

Tres el so regresu esti cursu, sigue la preocupación poles zones que nun se metieron na reforma como’l salón d’actos y un edificiu apegáu que pertenez a la Conseyería. Amás hai problemes de salobridá rellacionaos cola presencia de palombos por cuestiones pendientes que tienen que ver col zarru, la falta d’execución de la cubierta d’un patiu incluyíu nel proyectu; l’ausencia de moblame de xuegos y la non reinstalación del equipu de megafonía qu’había.

SUATEA considera necesariu que’l Conceyu esclarie qué actuaciones tán pendientes, cuálos tán previstos y cómo se va garantizar que les coses que quedaron fuera del proyectu principal reciban tamién una solución.

Les competencies compartíes nun pueden ser la disculpa

 El deficiente estáu de les infraestructures de los centros educativos ye una quexa constante y una molición pa la comunidá educativa que ve cómo la distribución de competencies ente Conceyos y la Conseyería d’Educación enllanca les posibles soluciones.

SUATEA reclama al Conceyu de Xixón y a la Conseyería d’Educación una revisión del estáu de les zones ensin rehabilitar de dambos dos colexos, mantenimientu preventivu, información clara de los espacios pendientes y una planificación coordinada pa dotales d’un nuevu usu cultural y públicu al serviciu de la ciudadanía. 

La rehabilitación d’un colexu un ha dase por rematada mientres siga habiendo espacios deterioraos, ensin mantener o ensin un destín definíu