5 d’ochobre: Día mundial de les y los docentes

POLA SALÚ DE LES NUESES/OS DOCENTES: MENOS BUROCRACIA, MÁS RECURSOS, MÁS CONCILIACIÓN Y MÁS CORRESPONSABILIDÁ

Dende la Organización de Muyeres de la Confederación Intersindical güei, Día Mundial de les y los Docentes, nun queremos facer un comunicáu sobro lo estenso de la nuesa vocación, queremos esponer la fotografía d’una realidá docente complexa y insana pal profesoráu, que los sos efectos nocivos socaven más entá a les docentes.

La educación pública caltiénse gracies al compromisu diariu de les sos profesionales. El colectivu docente demostró que nun afuxe de l’adversidá; sicasí, la educación de les futures xeneraciones, nun debe nin puede siguir calteniéndose a cuenta de la nuesa salú.

La Confederación de sindicatos STES-i apurrió indicadores mui significativos sobro’l malestar docente al traviés de la macroencuesta estatal completada por más de 13.000 profesionales. Estos datos amosen un profesoráu a piques del escosamientu y una realidá docente cada vegada menos sostenible.

• El 96% del profesoráu confiesa sentise agotao y enterrao baxo una carga de trabayu estra. La burocracia ye afogadiza y la proliferación de xeres alministratives innecesaries alloña a los profesionales del llabor pedagóxicu. A la xornada añedióse una llarga llista de llabores non docentes qu’amás inclúi l’estrés de recibir notificaciones dixitales 24 hores. El profesoráu soporta la xestión d’eventos, beques, llibros, tresporte y comedores, busca de práctiques n’empresa y implementación de protocolos d’acosu, ciberacosu, convivencia o suicidiu; igualdá, planes de dixitalización y salú; realización d’entrevistes coles families y diversos profesionales fuera d’horariu escolar y otru cientu de xeres.
• El clima escolar deterioróse notablemente. El 82,6% del profesoráu valora la redolada nes aules como conflictiva o complicada, con una notable medría de conductes negatives y la percepción d’una creciente desprotección per parte de l’alministración.
• Les aules tán masificaes. Más del 91% del profesoráu espón que les ratios actuales torguen ufiertar una atención afayadiza a un alumnáu cada vez más diversu qu’inclúi distintos diagnósticos y desconocimientu del idioma o idiomes propios del país.
• La escasez de profesoráu pa cubrir puestos de trabayu ye alarmante y precisa atención urxente. El 88,3 % del profesoráu considera que la sociedá, polo xeneral, nun valora’l nuesu trabayu como docentes. La degradación del oficiu foi n’aumentu, provocando ente otres causes un abandonu inéditu nel sector.

Pa enriba, esti malestar nun afecta a toos y toes por igual, una y bones la docencia (sobremanera nes primeres etapes) ye un oficiu fondamente feminizáu y, anque la proporción ta camudando, ye histórica y significativa la delegación de los cuidaos de la familia y de los llabores del llar nes muyeres.

Angüaño, n’España, inda nun puede falase de corresponsabilidá: les muyeres siguen asumiendo una parte desproporcionada del trabayu non remuneráu —cuidaos de fíos y persones dependientes, xeres doméstiques y la llamada carga mental —, realizando en munches ocasiones una eterna y invisibilizada doble o triple xornada llaboral.

Esta situación traduzse pa les docentes en xornaes llaborales realmente agotadores, mayor precariedá llaboral, trayectories profesionales más fráxiles y menor asunción de cargos directivos. Destacar güei el llabor de les docentes implica reconocer que’l deterioru de les sos condiciones llaborales ye tamién una forma de violencia institucional de xéneru que tenemos de reconocer y nun ignorar.

• Les midíes de conciliación (trabayu soportáu esencialmente por muyeres) son insuficientes y poco realistes. Entá nun se contempló una midida que suponga una adaptación del horariu pal cuidáu de fíos o mayores al to cargu ensin amenorgamientu de la capacidá alquisitiva yá que nin siquier los permisos y llicencies aprobaos nes meses xenerales del funcionariáu apliquen al profesoráu. Conciliar na docencia supón un amenorgamientu de xornada y retribuciones que causa una notable perda del poder alquisitivu pa les docentes.
• Les comisiones por agrupación familiar son inesistentes en casi toles comunidaes y tampoco se considera esta causa nos concursos de tresllaos. Ser interín/a supón exercer el to trabayu mientres períodos d’entre una selmana a un añu en distintes localidaes; supón separtate de la to familia, tengas o non fíos, tengan siete meses o 17 años.

A lo último, amás de les condiciones llaborales, destacamos que se sigue menoscabando y ignorando la figura de la muyer nos llibros de testu y currículos educativos. Los méritos y contribuciones de la mesma siguen siendo poco visibles, siendo imperativo revisar los materiales d’estudiu.

Nesti día, nun queremos más declaraciones vacies d’agradecimientu. Porque sostener el sistema educativu públicu nun puede siguir dependiendo de l’autoesplotación, el deterioru de la salú, la culpa o l’arrenunciu al tiempu o a la familia de les y los trabayadores.

Por ello, nesti Día de los y les Docentes, alzamos la voz pa esixir polítiques públiques que pongan el bientar docente nel puntu de mira y propongan cambeos estructurales urxentes, garantizando midíes efectives de conciliación coeducativa y corresponsabilidá.

¡Escuela: pública, gratuita, laica, igualitaria, conciliadora y corresponsable!