Esta entrada está disponible en: Castellano (Castellanu)
15 d’ochobre de 2026 – Día Internacional de les Muyeres Rurales
El mundu rural nun s’afita únicamente sobre la tierra que se cultiva, los paisaxes que se caltienen o los recursos que s’esploten. El mundu rural tiense, fundamentalmente, sobro les persones que lu habitamos, lu trabayamos y lu cuidamos. Y nesa xera, les muyeres venimos desempeñado históricamente un papel imprescindible, demasiaes veces invisibilizáu y infravaloráu.
Dende la Organización de Muyeres de la Confederación Intersindical, con motivu del Día Internacional de les Muyeres Rurales, reivindicamos que les muyeres non solo tenemos contribuyío al desenvolvimientu de los nuesos pueblos, sinón que fuimos y siguimos siendo protagonistes fundamentales de la so riqueza, la so cohesión social y el so futuru.
Mientres xeneraciones, les muyeres trabayemos la tierra, pañamos les colleches, atendimos al ganáu, sostuvimos pequeños negocios y caltuvimos vives les economíes familiares. Al mesmu tiempu, asumimos gran parte de los cuidaos de la infancia, les persones mayores y dependiente. Un trabayu imprescindible pa la sociedá que, demasiaes vegaes, nun figuraba en nenguna nómina nin xeneraba derechos llaborales o independencia económica.
Esta desigualdá tien una hestoria que nun podemos escaecer. Nel campu, mientres bona parte del sieglu XX, les muyeres percibimos xornales inferiores a los de los homes. Anque la igualdá retributiva llogró reconocencia llegal en 1970 y quedó recoyida nel Estatutu de los y les Trabayadores de 1980, la discriminación real allargóse demientres décades.
Aquelles muyeres nun trabayaben menos, nin les sos manes producíen menos riqueza. Lo que valía menos yera’l so trabayu a los güeyos d’una sociedá fondamente desigual.
Y aquella inxusticia inda tien consecuencies. Según datos del Ministeriu d’Agricultura correspondientes a 2024, les muyeres representen aprosimao’l 32% de les persones titulares d’esplotaciones agraries nel estáu español. Anque siempres trabayamos el campu, siguimos atopando obstáculos p’aportar a la propiedá, a los recursos granibles y a los espacios de decisión.
Pero falar del futuru de los nuesos pueblos ye tamién falar de servicios públicos. La despoblación nun se combate namás con discursos sobro les bondaes de vivir nun pueblu. Combátese garantizando escueles públiques, centros de salú, escueles infantiles de cero a trés años, atención a la dependencia, tresporte públicu, vivienda y oportunidaes llaborales. Cada serviciu que desapaez supón una dificultá añedida pa les muyeres, sobre les que recaen mayoritariamente les responsabilidaes de los cuidaos.
La conectividá constitúi otru desafíu fundamental. L’accesu a internet calidable y a una rede móvil suficiente resulta imprescindible pa estudiar, teletrabayar, entamar proyectos y acceder a servicios. Pero tar conectaes tamién significa poder movese, disponer de tresporte públicu y nun depender d’un vehículu priváu pa lllegar al trabayu, a una consulta médica o a una actividá formativa.
La igualdá territorial tamién ye igualdá de xéneru. El códigu postal nun puede determinar los derechos nin les oportunidaes de les muyeres.
Dende la Organización de Muyeres de la Confederación Intersindical, esiximos polítiques públiques qu’asitien a les muyeres nel centru del desenvolvimientu rural: empléu dignu, igualdá salarial, reconocencia del trabayu agrariu, sofitu al emprendimientu femenín, accesu a la tierra, corresponsabilidá nos cuidaos y participación real nos espacios de decisión. Reclamamos, amás, recursos abondos pa combatir les violencies machistes, especialmente n’aquellos territorios onde les distancies y la falta de servicios especializaos ponen trabes al accesu a la protección y l’atención.
Defendemos una educación pública de calidá como garantía d’igualdá y enraigonamientu, porque cerrar una escuela rural nun supón namás perder un serviciu educativu: significa debilitar les posibilidaes de futuru de too un pueblu.
Esti 15 d’ochobre nun queremos llindanos a rindir homenaxe a les muyeres rurales. Queremos esixir qu’el nuesu trabayu dexe de ser invisible y que la nuesa aportación a la riqueza de los nuesos territorios se torne en derechos, autonomía económica y oportunidaes.
Los nuesos pueblos nun precisen muyeres obligaes a aguantar. Precisen muyeres llibres pa decidir quedar, marchar o tornar. Muyeres con derechos, con empléu, con autonomía y con voz propia.
Porque defender a les muyeres rurales ye defender la vida de los nuesos pueblos. Y defender los nuesos pueblos esixe garantizar los derechos de les muyeres.
Organización de Mujeres de la Confederación Intersindical
Secretaría de Feminismu del SUATEA
15 d’ochobre de 2026
Esta entrada está disponible en: Castellano (Castellanu)
SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
