La nueva llei de FP sin decretos de curriculum nin evaluación

Escomencipia la implantación de la Llei nueva de FP ensin la publicación de los Decretos de los currículos de los ciclos formativos nin la normativa pa evaluar al alumnáu 

Con fecha de 30/8/24 publicáronse les orientaciones pa l’entamu de cursu en Formación Profesional pero nun tán publicaos los nuevos Decretos colos currículos nin la regulación de la ordenación y evaluación de les enseñances: FALTA por tanto, la normativa autonómica pa empecipiar la implantación de la Llei Orgánica 3/2022, del 31 de marzu, d’ordenación y integración de la Formación Profesional pola que se convierte a tola FP en Dual, con alternanza de formación en centros educativos y empreses dende’l primer cursu.

Los decretos autonómicos pendientes d’ellaboración y publicación son los siguientes:

Decretu pol que se regula’l diseñu, la organización xeneral y el currículu de les ufiertes formatives del Sistema de Formación Profesional nel Principáu d’Asturies.

Decretu pol que se regula la ordenación de les ufiertes formatives del Sistema de Formación Profesional impartíes en centros docentes nel Principáu d’Asturies y la evaluación del alumnáu.

Mientres s’espera la publicación d’esta normativa autonómica pendiente, dende la Conseyería d’educación remiten al profesoráu de FP a aplicar la normativa básica, anterior y apurren una documentación a medies pa poder poner en marcha’l cursu. Piden al profesoráu qu’ellabore yá dos aspectos pa poder funcionar:

• Les resultancies d’aprendizaxe y criterios d’evaluación.

• Los procedimientos y criterios p’asignar al alumnáu pa la formación n’empreses.

El restu (programaciones, proyectu educativu…) queda pa  fin de cursu, momentu nel qu’espere tener la normativa autonómica.

Nestes instrucciones d’entamu de cursu pa la FP, nun apurren una planificación de cuándo han de ser les evaluaciones nin la formación n’empresa, dexando la organización de dichos aspectos a cada centru. Coles mesmes, nun hubo nengún tipu de negociación nin mesa sectorial pa tratar los nuevos Decretos de cada títulu de FP, como sí asocede nel restu de territorios. Cuando Javier Cueli, Director Xeneral de la Planificación de Formación Profesional, afirmó n’una xornada informativa que “la FP ye distinta” nun suponíamos que se refería a siguir co la lexislación pertinente.

Recordemos que la Llei Orgánica 3/2022, del 31 de marzu, d’ordenación y integración de la Formación Profesional y el Real Decretu 659/2023, del 18 de xunetu, pol que se desenvuelve la ordenación del Sistema de Formación Profesional ye un cambéu tres 25 años de l’actual Formación profesional con novedaes tales como:

La formación n’empreses escomencipia nel primer cursu amás d’el segundu, y convierte a dellos profesionales de les empreses en profesores qu’imparten currículum regláu, en cuenta de ser una parte práctica complementaria como yera antes. Poro, aumenten les hores de formación del alumnáu, de 380 hores a 500 hores nel réxime xeneral y a 700 hores, si ye intensivu. La Conseyería d’Educación presume de l’alternanza que va faer l’alumnáu: dir a la empresa y depués al centru educativu, dende’l primer cursu. Pero esti cambéu d’exa que prioriza l’interés del mercáu llaboral y l’enfoque neolliberal de la educación puede restar a esta la so xera tresformadora, de formación crítica y integral.

Introdúcense adaptaciones p’alumnáu con necesidaes educatives especiales pero nun dicen qu’apenes hai refuerzu n’Orientación pa sofitar que’l profesoráu introduza tales adaptaciones. El cursu pasáu, per primer vez, introducieron orientadores nos Centros Integraos de FP (CIFPs) y esti cursu reforzaron con 4 orientadoresna más n’IES con dellos ciclos formativos y más de 1000 alumnos. Sicasí, munchos centros con ciclos de FP siguen con un  orientador a pesar de que medra la so carga llaboral, como l’IES Fregadures, l’IES Emilio Alarcos en Xixón, l’IES Cuenca del Nalón, l’IES de Llanes, l’IES Sánchez Lastra y l’IES El Batán en Mieres, o l’IES Aramo n’Uviéu, por poner namás unos exemplos. Nun dotar de facto de los recursos necesarios pa implementar estes midíes nueves  ye’l termómetru pa testar el so compromisu real con elles.

Nun dicen que los requisitos en titulación pa que los profesionales de les empreses sían profesores son enforma menores que los esixíos al profesoráu de la Conseyería d’Educación, colo que se infravalora la formación pedagóxica per un sitiu, y cuestiónase l’accesu al empléu por méritu y capacidá, por otru, lo que va influyir na consiguiente perda de la calidá educativa.

Nun dicen que van menguar les hores asignaes al profesor/a tutor/a del centru educativu pa consiguir empreses y tutorizar al alumnáu (hasta agora 6 periodos lectivos). Esti primer cursu de transición permanez similar, pero vien una mengua importante nel futuru inmediatu, lo que supon una amenorga d recursos y de sofitu al alumnáu na so estancia formativa.

Nun dicen que se cuerre’l riesgu de que sían les empreses les qu’escueyan al alumnáu que meyor-yos convenga y refuguen al que tien más dificultaes, lo que supondría apurri-yos a les mesmes empreses un serviciu d’empléu a la carta.

Nun dicen que se sacrificaron hores de los módulos específicos de cada ciclu que son la cadarma esencial de cada formación pa incluyir nuevos módulos tresversales como Sostenibilidá aplicada al sistema granible que’l so currículum cuerre al cargu de Naturgy y desenvuelve una visión acrítica de l’Axenda 2030.

Nun dicen que’l profesoráu del cuerpu de Profesores Técnicos a escastar (cuerpu 591) y el profesoráu Especialista en Sectores Singulares (cuerpu 598) realicen les mesmes funciones ya imparten los mesmos módulos qu’otros compañeros/as que s’integraron nel cuerpu de Secundaria (590) por tener una titulación de grau y hai una discriminación salarial que, en munches CCAA, compensóse con un complementu económicu.

Nun dicen que la nueva Llei abre la puerta a los conciertos educativos en FP yá que academies privaes pueden ser autorizaes pa recibir fondos públicos ya impartir Formación Profesional, incluyida la modalidá online; lo que supon nun apostar por una formación pública robusta en recursos y escelsa en calidá.

Nun dicen que se disparó la FP quitada nun 460% na última década por falta de places na educación pública, principalmente en Graos cimeros y na so modalidá a distancia lo que pon de relevancia un gran problema de equidad porque la educación pública nun respuende al aumentu de demanda facilitando asina la privatización de la FP.