SUATEA reclama una atención urxente pa los centros d’educación especial

SUATEA denuncia la falta d’atención que tán recibiendo los centros d’educación especial y esixe a la Conseyería d’Educación qu’adopte midíes urxentes para garantizar unes condiciones afayadices tantu pal alumnáu como pa los y les profesionales que trabayen nellos.

El Centru Públicu d’Educación Especial de Llatores alcuéntrase saturáu y presenta importantes defectos estructurales que tienen de ser solucionaos. Dalgunes d’estes faltes yá fueren denunciaes pol sindicatu ensin que, hasta’l momentu, s’ufiertara una respuesta apropiada. Ye’l casu, por exemplu, de l’ausencia de toldos que protexan del calor, una midida básica y especialmente necesaria énte los episodios d’altes temperatures.

Pela so parte, el CPEE Juan Luis Iglesias Prada sigue ensin recibir respuesta al so pidimientu de personal, magar la creciente demanda de places y a la especial intensidá de l’atención que requier l’alumnáu d’estos centros. Esto evidencia una falta de planificación per parte de la Conseyería d’Educación que nun ye capaz de dar respuesta en tiempu y forma al aumentu de la matrícula.

SUATEA recuerda que’l profesoráu y el restu de profesionales de la educación especial desenvuelven una llabor d’enorme valir en condiciones particularmente esixentes. El so trabayu implica, en numberoses ocasiones, un importante esfuerzu físicu p’ayudar a movilizar o atender al alumnáu nes actividaes cotidianes. Tamién tienen d’intervenir énte situaciones de desregulación o crisis conductuales que, de manera involuntaria, pueden dar llugar a golpes, cayíes o mancadures. Estes situaciones formen parte d’una realidá complexa que tien d’encarase con profesionalidá y ensin estigmatizar al alumnáu, pero que tampoco puede ser ignorada pola Alministración.

La consecuencia de too esto ye la derivación del alumnáu a centros privaos-subvencionaos que, pa más inri, tán especializaos n’afecciones concretes y nun tán preparaos p’atender a la diversidá de necesidaes que presenta l’alumnáu. A esto, hai que sumar tamién la incertidume que xenera nes families y n’el mesmu alumnáu nun saber ónde va ser la so escolarización.

La educación especial nun puede quedar relegada a un segundu planu. La Conseyería tien d’escuchar a los centros, responder a los sos pidimientos y apurrir el personal, les instalaciones y los recursos necesarios pa garantizar una educación pública digna y calidable, según unes condiciones llaborales segures pa quien la faen posible. Nun puede ser que, a día de güei, los Centros d’Educación Especial sigan ensin cuntar con una normativa propia que regule’l so funcionamientu. Lo especial d’esta educación nun puede ser el so perpetuu estáu de marxinación.