Día Internacional contra la Violencia y l’Acosu na Escuela, incluyíu’l Ciberacosu

Esta entrada está disponible en: Castellano (Castellanu)

Col motivu del Día Internacional contra la Violencia y l’Acosu na Escuela, incluyíu’l Ciberacosu, dende SUATEA y la Organización de Muyeres de la Confederación Intersindical queremos falar d’una realidá que conocemos bien porque forma parte de la vida de los nuestros centros. Como docentes, como muyeres y como parte de la comunidá educativa, esmoleznos cualquier forma de violencia que convierta la escuela nun llugar nel que daquién pueda sentir mieu, humildación o soledá.

Cuando falamos de violencia na escuela, pensamos munches vegaes nel acosu ente iguales, pero sabemos que la realidá ye más amplia. Vémosla nos insultos, les burlles, les amenaces, la esclusión o la discriminación; ente l’alumnáu, pero tamién pal profesoráu, el personal non docente o nes relaciones coles families. Y sabemos tamién qu’estes situaciones nun terminen necesariamente cuando sentimos el timbre: les redes sociales pueden facer que la violencia siga fuera de les aules y nel propiu llar.

Como feministes, sabemos amás qu’estes violencies nun apaecen al marxe de la sociedá na que vivimos. El machismu, la LGTBIfobia, el racismu, el capacitismu y otres discriminaciones tamién traviesen la vida de los centros. Les relaciones de poder, los estereotipos y los mandatos de xéneru tan presentes na nuestra forma de relacionanos y pueden tar detrás de situaciones d’esclusión, control, humildación o acosu.

Esmoleznos especialmente lo que pasa nos espacios dixitales. Compartir una imaxe ensin consentimientu, controlar a la pareya al traviés del móvil, facer comentarios sobre’l cuerpu d’una compañera, sexualizala o usar les redes pa ridiculizar a daquién, nun son chancies ensin importancia. Son conductes sobre les que tenemos qu’educar y actuar.

Nun queremos una escuela que respuenda a la violencia namás con castigos. Esto nun significa mirar pa otru llau o quita-y importancia al dañu. Cuando daquién sufre una agresión, la primer responsabilidá ye protexer a esa persona, detener esa violencia y garantizar la so seguridá.

Pero educar tamién significa dir más allá.

Creemos que quien fae un mal, tien d’entender lo que fixo, asumir les consecuencies de los sos actos y deprender a relacionase d’otra manera. Por eso defendemos una cultura restaurativa, na que la responsabilidá y la reparación tengan más pesu que’l castigu por sí solu.

La reparación nun puede, en nengún casu, tornase nuna nueva carga pa la víctima. Tien que valir pa responsabilizar a quien fexo’l dañu y pa entruganos tamién qué podemos camudar como comunidá pa evitar que vuelva a pasar.

Les persones que trabayamos na educación sabemos que la convivencia nun se constrúi con un protocolu guardáu nun caxón. Constrúyese caldía: nes aules, nel patiu, nos pasiellos, nes xuntes coles families y tamién nos grupos de WhatsApp y nes redes sociales.

Por eso defendemos la coeducación como una ferramienta imprescindible pa prevenir les violencies. Tenemos qu’enseñar a espresar los conflictos ensin agredinos, a respetar les llendes, a escuchar, a pidir ayuda y a reconocer cuándo facemos dañu.

Pero tamién tenemos que cuestionar los modelos que siguen enseñando a los mozos que ser fuerte significa dominar, que nun pueden amosar vulnerabilidá o que tienen qu’imponese. Y a les moces, que tienen qu’agradar, que dase o facese responsables del bientar de les demás persones.

Queremos educar nel consentimientu, nel respetu al propiu cuerpu y al de les demás persones, na diversidá, nes rellaciones afectives igualitaries y nos cuidaos. Unos cuidaos que tienen que ser responsabilidá de toes y de toos y non un llabor que recái nes muyeres.

Nun podemos pidir a los centros qu’afronten too esto ensin medios. Necesitamos tiempu, formación, personal y recursos pa trabayar la prevención, la coeducación, l’acompañamientu y la compesación del dañu. Y necesitamos que les administraciones educatives asuman la responsabilidá que-yos correspuende.

Tamién queremos falar de quien educamos. Nun podemos normalizar los insultos, les amenaces, el despreciu o les agresiones escontra’l profesoráu y el restu del personal de los centros. Cuidar la escuela significa tamién cuidar a les persones que trabayamos nella.

Necesitamos igualmente a las families y, de xuru, al alumnáu. Queremos que les alumnes y alumnos sepan pidir ayuda cuando una persona ta sufriendo. Que nun compartir una humildación, nun rir una burlla o ponese al llau de quien ta siendo escluyida o escluyíu tamién ye tomar posición.

Dende SUATEA y la Organización de Muyeres de la Confederación Intersindical queremos una escuela que nun eduque dende’l mieu, sinón dende la responsabilidá. Que nun enseñe a callar énte la violencia, sinón a reconocela y afrontala. Y qu’entienda qu’educar pa la paz ye tamién educar na igualdá, nos cuidaos y nel respetu a les demás persones.

Por eso, nesti día queremos facer una llamada a tola comunidá educativa. Al alumnáu, pa que nun mire pa otru llau cuando una compañera o un compañeru ta sufriendo. A les families, pa qu’eduquen nel respetu y acompañen dende la escucha. Al profesoráu y al restu del personal de los centros, pa que sigamos construyendo espacios de confianza nos que sía posible falar, pidir ayuda y reparar. Y a les administraciones educatives, pa que dexen de tratar la convivencia como una responsabilidá que los centros tienen de resolver solos y pongan los recursos necesarios pa trabayala de manera real y continuada.

Nun podemos callar delantre d’una agresión. Nun normalicemos el control o’l despreciu. Nun podemos dexar sola a la persona que sufre. Tenemos qu’atrevenos tamién a revisar les nuestres propies conductes, a cuestionar les relaciones de poder y a educar pa resolver los conflictos ensin violencia.

Porque la convivencia nun ye daqué que venga dao. Construyímosla ente toes y toos, caldía.

SUATEA
Organización de Muyeres de la Confederación Intersindical

Esta entrada está disponible en: Castellano (Castellanu)

Check Also

Declaración pol reconocimientu vital y la visibilidá de la menopausia

Esta entrada está disponible en: Castellano (Castellanu) Por una vida plena en toles nueses edaes …