SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
El sindicatu caltuvo una reunión billateral cola conseyera d’Educación, Eva Ledo, y la directora xeneral de Personal Docente, María Antonia Vivanco, pa tratar de les condiciones de trabayu del profesoráu asturiano y otres cuestiones rellacionaes cola educación pública.
En relación coles oposiciones, la Conseyería comprometióse a abrir un grupu de trabayu coles organizaciones sindicales pa revisar el procedimientu y ameyorar les sos garantíes y la tresparencia.
En cuanto al alcuerdu d’interinos, SUATEA reclama que nun esista obligación de presentase a les oposiciones pa caltenese nes llistes d’interinidá. Tamién se trató la necesidá de garantizar que tol profesoráu pueda incorporase a los centros dende’l primer día de cursu, entainando los plazos de les dos primeres convocatories.
Tamién se trataron les condiciones de trabayu de los equipos directivos y les tutoríes. SUATEA reclamó que’l profesoráu que desenvuelve estes funciones disponga de mayor dedicación horaria pa poder desenvolver en condiciones la xera y la responsabilida que se tien, menguando la so carga lectiva. Coles mesmes, esixóse que nengún equipu directivu seya unipersonal y ameyorar les sustituciones de los sos miembros.
SUATEA esixó a la Conseyería que, énte la falta de consensu cola mayoría sindical pa la reducción d’hores lectives pal profesoráu mayor de 55 años, reabrir el grupu de trabayu p’avanzar nel cumplimientu del Pactu Asturies Educa.
Tamién ye urxente el fin de los conciertos educativos n’aquellos casos nos que, por baxada de la natalidá, se pueda absorber a esi alumnáu dende la rede pública. Estes condiciones cúmplense yá n’Avilés y na Cuenca’l Nalón.
A lo último, SUATEA insistió na necesidá d’acelerar los plazos pa que l’aprobación de la especialidá d’asturianu nun quede a espenses de la coyuntura electoral.
Pa SUATEA, la reunión tien de sirvir p’avanzar en midíes concretes qu’ameyoren les condiciones llaborales del profesoráu y fortalezan la educación pública asturiana
Esta entrada está disponible en: Castellano (Castellanu)
