¿Cuánto dineru perdisti como docente nos últimos años?

• Les últimes xubes salariales, algunes d’elles entá sin aplicar, son totalmente insuficientes, y siguen ensin recuperase les pagues extres íntegres.
• Hai qu’iguar la perda de poder adquisitivu del profesoráu, con un alcuerdu salarial que corrixa estos defectos y amieste’ll sueldu al IPC a futuru, primero de reformar la profesión docente.
• La perda de poder adquisitivu ye unu más de los munchos factores que contribúin a la “Gran deserción” per parte del profesoráu.

Dende’l 2010, l’Índiz de Precios de Consumu estatal (IPC) aumentó un 36,4 %, bien percima de la crecedera salarial de los docentes, que malamente algamó un 14,5 % en promediu pa tolos cuerpos docentes y territorios. Esto supón una perda de poder adquisitivu del 21,9 %, que ye un datu que yá de por si asusta.

Sicasí, trátase d’una semeya fixa de la situación actual, y ye cuando traducimo los datos porcentuales acumulaos dende’l 2010 a términos absolutos, que dámonos cuenta de que l’impactu ye devastador. Un par d’exemplos: con 15 años d’antigüedá, en promediu pa tolos territorios y niveles (A1 y A2), cualquier docente dexó de ganar 58.160 € de media en tol estáu, que pueden llegar hasta los 83.075 € con 35 años de serviciu. 

Esto choca colo qu’asocede con otros sectores pal mesmu periodu d’estudiu. Según la estadística Mercáu de Trabayu y Pensiones nes Fontes Tributaries de l’Axencia Tributaria, los sueldos revalorizáronse un 30,4 %. Los datos qu’amuesa’l Ministeriu de Trabayu y Economía Social de los convenios colectivos falen d’una medría del 30,7 %. D’otramanera, el salariu mínimu interprofesional medró un 79,1 %. 

A empiezos d’esti 2025, el Gobiernu anunciaba, depués de pactar colos sindicatos CCOO y UXT, una xuba adicional del 0,5 % pa los docentes, que se sumaba al 2 % yá aprobáu pa 2024. Esta xuba salarial namás podemos calificala como de mui probetaya, y en nengún casu compensa’l deterioru económicu de los últimos años.

La clave del problema ta en que les xubes salariales nun tuvieron venceyaes al IPC, lo que xeneró un desfase que cada vez va a más ente los ingresos del profesoráu y l’aumentu del costu de la vida, sobremanera dende’l 2010, verdaderu puntu d’inflexón consecuencia de la crisis económica

A esto sumase la perda de pagues estraordinaries que yá denunciemos y esiximos que se recuperaren íntegramente al Gobiernu al traviés de la Confederación Intersindical – STEs. La Llei 30/1984 establecía que les pagues estraordinaries teníen d’equivalir, a lo menos, a una mensualidá completa de sueldu y trienios. Sicasí, cola crisis de 2008, el Real Decretu-llei 8/2010 menguó la so cuantía sobre un 40 %, un retayu qu’entá persiste y que se traduz nuna cuantía d’hasta 18.344 € dende entós dependiendo de l’antigüedá. Mentanto, los y les trabayadores del sector priváu siguieron percibiendo les sos pagues íntegres.

El personal público exerció un gran papel na recuperación del país depués d’aquella crisis: con baxaes de sueldos; con un “préstamu obligáu” al Estáu cola supresión de la extra de Navidá de 2012 (que foi devuelta años dempués ensin intereses); ensin mentar la so especial contribución mientres la pandemia. 

Por ello, el Gobiernu tien de revertir la situación al traviés d’un nuevu alcuerdu salarial, qu’en primer instancia desanicie esi 21,9 % de perda de poder adquisitivu, pa dempués amestar el sueldu a les variaciones del IPC.

La perda de poder adquisitivu (PPA) del estudiu que presentamos fai referencia a cifres en brutu, polo qu’habría qu’aplica-y les deducciones qu’en cada casu correspuendan, que pueden variar ente’l 8 y el 30 % (IRPF, Seguridá Social, Muface, etc.).

A la hora del cálculu, asumimos les siguientes hipótesis:

1) Considérase qu’hai perda de poder adquisitivu solamente dende 2010, que tamién ye cuestionable, pero por simplificar afitóse como orixe.

2) Cuntar con tolos trienios y sexenios correspondientes en función de l’antigüedá.

3) Nun s’inclúi nengún complementu por cargu (equipu directivu, xefatura de departamentu, etc).

A lo último, al rodiu de la reforma de la profesión docente que plantega’l Ministeriu d’Educación, FP y Deportes, que dende STEs y SUATEA yá denunciamos nel so día, y que yá empezó a axustase, queremos dexar claro que la carrera profesional que pretenden llantar y la posible revisión de los sueldos amestada a la evaluación docente, en nengún casu pueden compensar esta perda de poder adquisitivu. De primeres hai qu’axustar una xuba salarial digna antes de reformar l’oficiu docente. Si nun ye asina, el profesoráu de l’estáu vamos siguir perdiendo poder adquisitivu.