Los problemes detectaos nel IES La Florida d’Uviéu en septiembre siguen ensin solucionase

Crez la molición de cara a les dos futures obres estrella: el IES nuevu de La Corredoria y el futuru CEE d’El Monte Cerráu

Esta mañana, un representante del SUATEA visitó’l IES La Florida (Uviéu) acompañando al Serviciu de Prevención de Riesgos Llaborales del Principáu d’Asturies, coles mires d’evaluar l’estáu del mesmu.

Como conclusiones más significatives, de primeres, tuvimos ocasión de constatar que l’institutu quedó pequeñu primero d’inauguralu, como avisáremos a primeros de cursu. Les consecuencies más series van poder vese cuando tea a plenu rendimientu. Nun ta claro nin siquier si podrán cursase toles modalidaes de Bachilleratu, porque nun paez qu’haiga aules abondo pa les distintes asignatures optatives, si coinciden varies a la mesma hora, que ye lo habitual nesta etapa educativa.

 Lo segundo, insistimos en que nin el diseñu de les aules nin el moblame respuenden a les necesidaes educatives, colo que’l profesoráu vese obligáu a improvisar costantemente y a buscar la fórmula menos mala pa poner clase. Amás, los patios cubiertos nun son abondo pa tol alumnáu en díes d’agua. A lo último, les espalderas del ximnasiu nun son tolo segures que teníen que ser pa tener del pesu del alumnáu, y la valla qu’arrodia l’institutu nun ye fiable.

Rescampla que cuando se constrúin algunos centros educativos nun ye dende una perspectiva docente. Ye verdá qu’esti centru tien un diseñu modernu y innovador, y que seguramente en planu quedara espectacular, pero’l profesoráu coincide en que, polo xeneral, ye bien pocu prácticu de cara a la función docente.

Dende’l SUATEA insistimos na valoración que yá fiximos na primer visita: esperamos que la Conseyería d’Educación tome nota y nun repita les mesmes enquivocaciones nos centros que tán por abrir, como son l’IES Margarita Salas de La Corredoria, que ta yá pa rematar, y el futuru Centru d’Educación Especial d’El Monte Cerráu, que, según la conseyera Lydia Espina va ser un referente a nivel estatal.

A lo último, consideramos que la Conseyería perdió una bona oportunidá pa construyir en La Florida un centru de referencia que diera realmente serviciu a la zona, con capacidá pa más alumnáu, de manera que se viera reforzada la rede escolar pública nuna zona d’Uviéu que destaca pola fuerte implantación de la rede concertada. Recordemos que fueron más les solicitúes de matriculación que la ufierta esistente’l mesmu cursu de la so inauguración.