SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
El 30 de marzu conmemorase’’l Día Internacional de les Trabayadores del Llar, establecíu pola ONU en 1988 pa visibilizar la discriminación y precariedá llaboral qu’enfrenta esti sector, mayoritariamente compuestu por muyeres, munches d’elles migrantes. Estes trabayadores sufren una triple discriminación: por xéneru, pol so orixe migrante y pola so situación de probeza.
N’España, hai unes 550.000 trabayadores del llar, d’elles el 95% son muyeres y solo el 45% ta en situación regular. Unes 40.000 trabayen como internes, con xornaes cansoses y ensin horarios definíos. Amás, munches arrecostinen con violencia y abusos, ensin poder denuncialos por cuenta de la so vulnerabilidá.
El trabayu domésticu tien raigaños na esclavitú y la servidume, lo que perpetuó la so infravaloración. Ye un llabor esencial para la sociedá, pues permite’’l funcionamientu de los llares y la economía, pero sigue ensin ser dafechu reconocíu.
El trabayu domésticu non pagáu y pagáu ye central pa la “sostenibilidá de la vida humana” y pal funcionamientu de los llares, la economía y el conxuntu de la sociedá. Tradicionalmente recayó nes manes de les muyeres, a quien la sociedá responsabiliza de llevar alantre les xeres del llar y el cuidu de toles persones, apostrando en munchos casos los sos proyectos personales, ente ellos, la posibilidá d’aportar al mercáu llaboral.
El trabayu del llar ye un empléu y, poro, tien de ser dignu. Les persones trabayadores del llar empresten servicios pal cuidu d’otres persones, incluyendo infancies, adultos mayores o persones enfermes, y realicen xeres que contribúin al caltenimientu de los llares, como la llimpieza o la preparación d’alimentos. Esto permite a les que contraten cumplir coles sos obligaciones llaborales y personales o cuntar con tiempu de descansu.
En 2011, la OIT aprobó un conveniu que reconoz los derechos básicos d’estes trabayadores, y n’España, el Real Decretu-llei 16/2022 ameyoró les sos condiciones llaborales, otorgándo-yos derechu a paru, indemnización por despidu y mayor protección social. Sicasí, entá s’esixe una meyor regulación del trabayu internu, más descansu, meyores salarios y una reconocencia profesional afayadiza.
Dende una perspectiva feminista, el trabayu domésticu llibera a les muyeres de clase media de la doble xornada, pero perpetúa la división sexual del trabayu y llibra a los homes de la so responsabilidá doméstica, tenemos d’esixir meyores condiciones salariales pa les trabayadores del llar, dignificar el so trabayu y defender la necesidá de polítiques públiques que socialicen los cuidos y mermen la carga doméstica individual. Tenemos de distribuyir equitativamente el trabayu domésticu ya implementar servicios públicos que garanticen el bienestar social ensin depender de la esplotación d’otres muyeres con menos recursos.
Esta entrada está disponible en: Castellano (Castellanu)
