SUATEA vota en contra de la propuesta de plantiyes pal cursu 2025-26

Nun respuende a les necesidaes reales del profesoráu, permite que la concertada siga medrando, y amás mengua’l númberu de places d’Atención a la Diversidá en centros d’Infantil y Primaria.

Esta mañana, les organizaciones sindicales con representación na Mesa Sectorial d’Enseñanza Non Universitaria caltuvimos la postrera xunta cola Dirección Xeneral de Personal Docente y la Dirección Xeneral de Función Pública pa tratar el tema de la plantiya orgánica pal cursu 2025-26, onde se nos presentó la propuesta final. Como yá denunciemos depués de la primer xunta, el Gobiernu más progresista de la historia d’Asturies afonda nel progresivu esmantelamientu de la rede pública en favor de la concertada. Bien adornáu, les cifres que se nos presenten paecen inclusive positives: el númberu total de puestos docentes pal cursu que vien va ser de 9.635 en plantiya orgánica, que supon 113 places más. De les últimes alegaciones feches polos centros y respaldaes polos sindicatos, namás se dio’l preste a 6 güei pela mañana. 

La trampa ye la siguiente: seguro qu’esmolecíos pola campaña del SUATEA qu’apunta al esmantelamientu de l’atención a la diversidá, y pretendiendo evitar que más actores políticos y sindicales se sumaren, presenten como un ésitu l’aumentu del personal d’Orientación, Pedagoxía Terapéutica (PT) y Audición y Llinguaxe (AL). Pero estos datos desmóntense rápido: esti aumentu dase mayormente en centros de Secundaria y d’Educación Especial, que lleven munchos años infradotaos. Analizando datos namás de centros de Primaria, atopamos retayos en tres especialidaes;: va haber 5 profesionales menos d’Orientación, 5 de PT, y 2 d’AL en plantiya orgánica pal cursu que vien.

El SUATEA siguimos considerando que la propuesta presentada ta mui perbaxo de les necesidaes reales del profesoráu que precisen los centros, y que tolos años compénsense un pocu, ensin negociación, con esa otra plantiya paralela de dudosa llegalidá que l’alministración llama “necesidaes autorizaes”. D’esta forma, la plantiya orgánica nunca va recoyer la totalidá de los puestos necesarios nin se va a amenorgar el 25% d’interinidá. 

Volvemos a posicionanos en contra de la mengua de puestos nes especialidaes d’Educación Infantil y Educación Primaria, porque esto implica una suba pequeña nel númberu de puestos  n’especialidaes (sobremanera Inglés) que van tener qu’asumir, amás de la so especialidá, una tutoría, pero con una perda neta de profesoráu nos centros. Como yá-yos tresmitimos a los responsables de Conseyería, tamos radicalmente en contra de concebir la inversión n’educación como gastu. Les etapes básiques son los pegollos del sistema educativu, y, solamente si nun dexamos d’invertir, vamos poder consiguir aforrar n’etapes posteriores. 

En resume, esta propuesta final refuerza lo que manifestamos yá depués de la primer xunta: en cuenta d’apostar pola rede pública, siguimos entorgando la estabilización del personal nos centros, según la posibilidá de realizar más desdobles y, por tanto, d’individualizar l’aprendizaxe y ameyorar asina la calidá educativa. Siguimos pensando que’l profesoráu asturianu ta abandonáu a la so suerte, y pal cursu 2025-26 nun paez que vaiga ameyorar la so situación llaboral.