11 d’ochobre – Día Internacional de la Neña

Comunicáu de la Organización de Muyeres de la Confederación de STEs

El 11 d’ochobre, Día Internacional de la Neña, recuérdanos la necesidá urxente de siguir lluchando pola igualdá real nun mundu nel que millones de neñes ven quebrantaos los sos derechos fundamentales. Nesti 2025, esta fecha apéllanos de forma entá más doliosa pola traxedia que tán viviendo les neñes palestines, víctimes directes de la guerra y del xenocidiu en Gaza.

Les neñes palestines tán siendo asesinaes, mutilaes, desplazaes y privaes de los sos derechos más básicos: la vida, la salú, la educación y la seguridá. Miles perdieron a les sos families, los sos llares y la so infancia. Munches sobreviven en condiciones inhumanes, ensin accesu a agua, alimentos nin atención médica, y sol trauma constante de los bombardeos y la violencia. Nun podemos permanecer en silenciu énte esta brutal vulneración de los derechos humanos, qu’atenta especialmente contra les más vulnerables.

En demasiaos llugares del mundu, les neñes son obligaes a abandonar la escuela por matrimonios forzaos, esplotación llaboral o violencia sexual. Güei tenemos d’añedir a esa llista la cruel realidá de les neñes palestines, a quien se-yos niega inclusive’l derechu a la educación porque les sos escueles fueron destruyíes, militarizaes o convertíes n’abellugos improvisaos. La guerra non solo arrampuña les sos vides, sinón tamién el so futuru.

Dende la Organización de Muyeres de STEs, defendemos que la educación pública, feminista y tresformadora ten de ser la ferramienta fundamental pa garantizar la igualdá de xéneru y la protección de la infancia, tamién en contestos de guerra. Por eso, esiximos a les alministraciones públiques, a los organismos internacionales y a los gobiernos que:

• Reclamen un altu’l fueu inmediato y el fin de la ofensiva militar sobro Gaza.
• Protexan y garanticen los derechos fundamentales de les neñes palestines, especialmente’l derechu a la vida y a la educación.
• Conderguen y frenen la vienta d’armes y cualquier complicidá col xenocidiu en cursu.
• Promuevan polítiques de cooperación internacional que pongan nel centru a la infancia y a les neñes en contestos de guerra y ocupación.

Nesti 11 d’ochobre, Día Internacional de la Neña, facemos un llamáu a la comunidá educativa, a les families y a tola sociedá por qu’alcemos la voz poles neñes del mundu y, con urxencia, poles neñes palestines. Nun podemos dexar que la guerra y el patriarcáu-yos roben la infancia, la dignidá y el futuru.

Les neñes de Palestina tamién son les muyeres del mañana. La so llibertá, la so vida y la so educación son la base imprescindible pa un mundu más xustu, igualitariu y en paz.

Por una educación pública, feminista y tresformadora.

Poles neñes, poles neñes palestines, por toes.

Organización de Muyeres de la Confederación de STEs