SUATEA aconceya cola presidenta del Conseyu Escolar del Estáu p’avanzar hacia la Especialidá d’Asturianu

Los díes 18 y 19 celebróse en Xixón el XXVI Alcuentru de Conseyos Escolares Autonómicos y del Estáu.

Nel marcu d’esti alcuentru, representantes del SUATEA caltuvimos un conceyu cola presidenta del Conseyu Escolar del Estáu, Encarna Cuenca Carrión, pa tratar de la necesidá de la creación de les especialidaes docentes d’asturianu y gallego-asturiano.

La creación d’estes especialidaes ye una reivindicación histórica del SUATEA y del conxuntu del movimientu de reivindicación llingüística d’Asturies. Ye importante recordar que yá nel añu 2014 el Conseyu Escolar del Estáu aprobó una resolución favorable a la creación de diches especialidaes, a propuesta del SUATEA.

Dende’l sindicatu siguimos col nuestru compromisu de siguir peleando pola reconocencia d’estes especialidaes docentes y asina garantizar la igualdá de derechos de los docentes de les llingües propies de Asturies.

Coles mesmes, el SUATEA reclama la implicación directa del presidente del Principáu, Adrián Barbón, pa que’l Gobiernu asturianu cumpla los compromisos recoyíos nel Pactu Asturies Educa y s’avance de manera decidida na creación de les especialidaes d’asturianu y gallego-asturiano.