SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Nel Día Européu pola Igualdá Salarial, dende la Organización de Muyeres de la Confederación Intersindical, volvemos alzar la voz para denunciar que la igualdá real ente muyeres y homes nel ámbitu llaboral sigue siendo una xera pendiente.
La brecha salarial nun ye namás una cuestión de cobrar menos pol mesmu trabayu. Ye’l reflexu d’un sistema que sigue asitiando a les muyeres en posiciones de mayor precariedá, temporalidá y parcialidá. Les muyeres siguen concentrándose en sectores feminizaos, peor remuneraos y con menor reconocencia social, lo que perpetúa desigualdaes estructurales que s’arrastren a lo llargo de tola vida llaboral.
Pero falar de brecha salarial tamién implica falar del repartu desigual de los cuidaos. Les muyeres siguen asumiendo mayoritariamente l’atención a menores, persones dependientes y mayores. Esta realidá tradúzse en reducciones de xornada, escedencies y abandonos temporales del empléu que tienen consecuencies directes nos sos salarios presentes y nes sos pensiones futures.
Cada escedencia por cuidáu qu’asume una muyer, cada xornada reducida, cada interrupción na so carrera profesional repercute en cotizaciones más baxes y, por tanto, en pensiones mamenorgaes. La desigualdá salarial de güei ye la desigualdá nes pensiones de mañana.
La igualdá salarial real pasa, necesariamente, por una corresponsabilidá efectiva nos cuidaos y por polítiques públiques que garanticen servicios públicos suficientes, universales y de calidá: educación infantil, atención a la dependencia y recursos sociales que dexen que cuidar nun sía una penalización llaboral nin económica pa les muyeres.
Dende la Organización de Muyeres reivindicamos:
- Igual salariu por trabayu d’igual valor.
- Midíes reales de corresponsabilidá y repartu de los cuidaos.
- Refuerzu de los servicios públicos que sostienen la vida.
- Reconocencia de les carreres llaborales de les muyeres ensin penalizaciones per maternidá o cuidaos.
- Pensiones dignes y ensin brecha de xéneru.
La igualdá salarial nun ye solo una cuestión de xusticia económica, ye una cuestión de xusticia social y feminista. Ensin igualdá nel empléu, nos cuidaos y nes pensiones, nun va haber igualdá real.
Organización de Mujeres de la Confederación Intersindical
Pola igualdá salarial y por una vida digna pa toes.
