Valoración de la primer parte del procedimientu selectivu 2026 y propuestes de meyora 

Nel SUATEA tamos viviendo con esmolecimientu lo que ta aconteciendo dende’l llunes, día de l’apertura de les pliques del procedimientu selectivu 2026. Nesti testu intentamos facer una valoración de la situación y proponer meyores de cara al siguiente procesu.

A lo primero, queremos tresmitir el nuestru apoyu y la más absoluta de les confiances nes compañeres y compañeros miembros de los tribunales d’oposición. Creemos que la so profesionalidá ye precisamente la base na que se sustenta qu’esti procesu, con tolos aspectos a meyorar que tien, siga siendo garantista pa les y los opositores. 

Al mesmu tiempu, entendemos y empatizamos cola frustración de les muches compañeres y compañeros aspirantes que lleven meses preparándose pa esti procesu y agora encuéntrense a les primeres de cambiu con una calificación que consideren que nun ye la correcta. Pero esta frustración nun pue llevanos a disparar contra los y les compañeres que tán nos tribunales y a llegar a la conclusión de que’l concursu-oposición ye una llotería. 

La oposición ye una prueba de selección enormemente dura (frente al contratu a deu por motivos diversos, como ser antiguu alumnu o alumna, que predomina na rede concertada). Requier una gran cantidá d’esfuerzu, que, amás, munches persones van facer sin que se vea recompensáu con una plaza. Pero, precisamente por eso, nun se pue desmerecer el trabayu que fixeron les persones aspirantes que sí llograron aprobar esta primer parte. 

Dicho too esto, SUATEA púsose ayeri en contactu de forma inmediata con Eva Ledo y tresmitimos-y la nuestra disponibilidá pa negociar una serie de cuestiones qu’afecten a les persones aspirantes qu’entendemos que podríen ser meyorables de forma inmediata, y en tou casu enantes del próximu procedimientu selectivu: 

• Revisión depués de la primer parte. Hai qu’ufrir a les persones aspirantes la posibilidá de solicitar revisión depués de cada una de les dos partes. 
• Criterios d’evaluación.  La rúbrica colos criterios d’evaluación tendría d’apaecer yá cola propia convocatoria del procedimientu selectivu. Amás, esa rúbrica podría, y creemos que tendría, ser lo más parecida posible a les que realmente usa’l tribunal. 
• Publicación de datos. La Conseyería tendría que publicar los datos de persones presentaes y persones que van al esame únicamente a firmar en los díes inmediatamente posteriores a la celebración de la primer prueba, siguiend’l modelu d’otros territorios. 
• Supuestos y pruebes práctiques. Tienen d’ufrise concreciones por especialidá de los supuestos prácticos. Si bien les persones aspirantes tienen que tener un dominiu completu de la so especialidá, nun ye menos cierto que se-yos podría perfectamente aclarar en qué puede consistir l’esame.

Añadimos a les anteriores otra serie de propuestes qu’afecten a les persones que formen parte de los tribunales de selección, y que, igual que les anteriores, entendemos que podríen ser d’aplicación inmediata yá nel siguiente procesu:

• Horariu. L’alministración tien de dar a les presidencies instrucciones que garanticen xornaes de trabayu razonables con descansos abondos. 
• Retrasos nos pagos. Ye urxente cambiar la normativa pa que seya posible cobrar los servicios prestaos na siguiente nómina, y non esperar varios meses. 
• Cuantíes sin actualizar y hores estra. Cola perda de poder alquisitivu que llevamos acumulada, nun puede ser que los miembros de tribunal cobren lo mesmo güei qu’en 2009. Amás, ye de xusticia que vocalíes, secretaríes y presidencies cobren más si faen hores estra (xornaes de +8 hores, y tamién fines de selmana). 

La conseyera Ledo tresmitiónos de vuelta’l so esmolecimientu, asina como la so disposición a revisar el modelu d’oposición antes de la siguiente convocatoria.

A lo último, y si bien toes estes midíes podríen ser d’aplicación inmediata, creemos que gran parte de los problemes qu’afecten al procesu pasen pola superación del nefastu Alcuerdu de Profesoráu Interinu de 2014. Per un llau, si nun esistiese la necesidá de presentase en persona al esame, esto permitiría axustar el númberu de persones necesaries pa conformar los tribunales. Per otru, sería perfectamente posible cambiar el calendariu d’actuaciones por otru que permitiera a los tribunales parase a revisar detenidamente toles primeres pruebes y atender a les reclamaciones con calma y tiempu abondo pa una xera tan importante.