SUATEA pide que les opositores puedan solicitar la revisión de la primer prueba antes de la segunda

El sindicatu esixe un nuevu Alcuerdu de Profesoráu Interín que ponga fin a los abusos sistemáticos que sufre’l colectivu

Tres la publicación de les calificaciones de la primer prueba de les oposiciones docentes, dende SUATEA queremos denunciar una situación que vuelve poner de manifiestu les carencies del actual sistema d’accesu a la función pública docente n’Asturies: les persones aspirantes que superen la primer prueba nun tienen la posibilidá de solicitar la revisión de la so calificación nin de conocer la motivación de la nota algamada enantes de que principie la segunda parte del procesu.

Son numberoses les ocasiones nes que les organizaciones sindicales solicitamos nos últimos años a la Conseyería que les persones aspirantes pudieren solicitar la revisión de la primer prueba y recibir una respuesta enantes del entamu de la segunda. Sicasí, l’Alministración decide sistemáticamente inorar esta propuesta.

Amás, esta situación nun fai más que siguir poniendo de manifiestu una reclamación compartida pol colectivu: l’Alcuerdu de Profesoráu Interín, roblao en 2014 y énte’l que SUATEA convocó movilizaciones, tien de ser sustituyíu yá por un nuevu testu que defienda de verdá los derechos de les persones aspirantes y nel que s’incluya una reivindicación que nun puede esperar más: el fin de la obligatoriedá de presentase al esame.

Fai namái unos díes reclamábamos meyores urxentes tanto pa les persones que formen parte de los tribunales como pa les persones opositores. Ente elles, y amás de lo que se refier al Alcuerdu, esixíamos la publicación de los criterios d’evaluación dende’l momentu de la convocatoria, l’actualización del repositoriu d’esámenes, o la publicación del baremu provisional con un plazu abondu pa presentar alegaciones.

Esiximos a la Conseyería d’Educación que, enantes de la siguiente convocatoria d’oposiciones, abra una negociación pa modificar l’Alcuerdu de Profesoráu Interín. Esti sector del profesoráu asturianu nun puede siguir esperando.