SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
L’aumentu d’alumnáu nun xustifica dexar ensin efeutu una midida fundamental pa reforzar la calidá de la FP pública en tiempos de crecimientu de la ufierta privada
SUATEA insta a la Conseyería d’Educación a adaptar les dotaciones de profesoráu destinaes a los desdobles de Formación Profesional a la matrícula real cola que los centros entamaron el cursu, dempués de que l’aumentu d’alumnáu xenerara necesidaes superiores a les previstes.
La mesma Conseyería anunció en xunu la incorporación de 16 módulos nuevos de Formación Profesional a los desdobles, 198 hores llectives adicionales —equivalentes a once puestos docentes a xornada completa— y l’amenorgamientu de 25 a 20 alumnos/es del umbral pa la so aplicación, atendiendo especialmente a criterios de prevención de riesgos llaborales y seguridá.
Sicasí, entamáu’l cursu, SUATEA ta recopilando y contrastando datos de distintos centros nos que módulos incluyíos nes instrucciones oficiales siguen ensin disponer del profesoráu necesariu pa efectuar los desdobles. Parte d’esta información yá foi treslladada a la Conseyería d’Educación, a la espera de que se cubran les necesidaes detectaes.
Ente los casos yá contrastaos atópense institutos y CIFP d’Uviéu, Xixón, Avilés, Mieres, La Felguera y Cangues d’Onís, y afecten a families como Imaxe Personal, Instalación y Mantenimientu, Fabricación Mecánica o Electricidá y Electrónica, ente otres. Tolos centros tresmítennos incertidume énte la situación de nun saber si se va mandar más dotación de personal docente, lo que supondría na mayoría de los casos tener que cambiar los horarios de tol profesoráu del centru, cola molestia que supon esto tanto pa docentes como pa equipos directivos, que yá de por sí tán sobrecargaos de trabayu nesti entamu de cursu.
En tolos casos trátase de módulos incluyíos nes instrucciones d’entamu de cursu ente los susceptibles de desdoble. Parte d’esta información yá foi treslladada a la Conseyería d’Educación; mentanto, SUATEA sigue recopilando datos d’otros centros.
Pa SUATEA, fortalecer la FP pública esixe que, si la matrícula definitiva superó les previsiones iniciales, se revise al alza la dotación de profesoráu, garantizando tanto la calidá de la enseñanza como la seguridá y la prevención de riesgos nes aules-taller.
Dende la nuesa organización seguimos recopilando información, y solicitamos a la Conseyería que faiga públicos yá los sos datos sobre qué desdobles tán funcionando, cuáles siguen pendientes y qué necesidaes adicionales de profesoráu se xeneraron dempués de conocese la matrícula real.
Esta entrada está disponible en: Castellano (Castellanu)
