SUATEA esixe a la Conseyería qu’igüe los desperfectos nel IES Cristo del Socorro de Lluanco

SUATEA denuncia que, mientres aumenta añu tres añu’l dineru pa la enseñanza concertada, los centros públicos siguen abandonaos. Esti añu la partida aumentó 3,8 millones d’euros y nos últimos cinco años la subida ye del 20%.

Dende SUATEA tuvimos acompañando na mañana d’esti martes 28 d’abril al Serviciu de Prevención de Riesgos Llaborales del Principáu d’Asturies na so visita al IES Cristo del Socorro de Lluanco pa evaluar los riesgos llaborales esistentes, tantu pal personal docente como pal alumnáu del institutu, constatando sobre’l tarrén numberoses deficiencies que requieren una actuación inmediata per parte de l’Alministración.

Ente les principales carencies del centru educativu destaca la urxente necesidá de reparación del patiu del edificiu históricu, catalogáu como BIC, con unes obres que yá salieron a licitación pública, pero que siguen pendientes de los permisos necesarios per parte de Patrimoniu Históricu. Esta situación ta provocando problemes graves como filtraciones y goteres, hasta’l puntu de que llueve dientro l’edificiu, afectando directamente al desarrollu normal de l’actividá educativa.

Amás, esisten otres obres irrenunciables como la reparación del armazón del teyáu del ximnasiu, con una cadarma que presenta daños importantes y requier una intervención urxente. A too ello súmase la falta de llimpiagüeyos d’emerxencia nos llaboratorios, una demanda treslladada pol propiu alumnáu, que trabaya con productos potencialmente tóxicos y peligrosos en materies como Química o Bioloxía, asina como la carencia de los EPIs necesarios pa garantizar la so seguridá. Asina mesmo, l’aula de tecnoloxía precisa d’un almacén zarráu pa la custodia segura de ferramientes y d’actuaciones qu’eviten
riesgos d’inundación.

Dende SUATEA pidimos a la Conseyería d’Educación qu’adopte midíes urxentes pa dar respuesta a estes y otres deficiencies que lleven llargu tiempu sin solución. Recordamos, amás, que dende SUATEA tenemos ellaboráu un mapa interactivu d’incidencies n’infraestructures educatives n’Asturies, y animamos al profesoráu y a los equipos directivos a rexistrar tolos desperfectos detectaos, col oxetivu de visibilizar la situación y presionar pa que s’acometan d’una vez por toes estes actuaciones imprescindibles.

Prensa: https://www.lne.es/aviles/2026/04/28/sindicato-suatea-urge-reparacion-urgente-129630544.html