SUATEA solicita una reunión cola Secretaría d’Estáu d’Educación y enfea a Barbón que nun s’implique personalmente cola especialidá docente d’asturianu

Dende’l Sindicatu Unitariu y Autónomu de Trabayadores de la Enseñanza d’Asturies (SUATEA) insistimos en dos de les nuestres reivindicaciones históriques: la oficialidá y la reconocencia de la especialidá docente como ferramienta fundamental pa la recuperación y normalización de les llingües propies d’Asturies.

Nesti contestu, solicitemos esta mañana una xunta cola Secretaría d’Estáu d’Educación pa tratar de manera específica la reconocencia de les especialidaes docentes d’asturianu y gallego-asturianu. Esti pidimientu da continuidá a la que se fizo’l miércoles 14 de xineru, cuando al traviés de los STEs-Intersindical treslladamos esta demanda a la ministra Milagros Tolón nun alcuentru qu’hubo nel Ministeriu.

Tamos en plena celebración de la Selmana de les Lletres, atacada de xestos institucionales vacios que nun suponen meyores reales. Ye hora qu’Adrián Barbón dexe de mirar pa otru llau y asuma personalmente col Ministeriu la negociación de la especialidá y ponga fin a la discriminación que sufren cientos de docentes asturianos.

Esta mesma selmana miembros de l’Asociación (ADAE) y representantes sindicales zarrémonos na Conseyería d’Educación para esixir meyores nel cumplimientu del Pactu “Asturies Educa”. Esti alcuerdu recueye explícitamente la creación de les especialidaes docentes d’asturianu y gallego-asturianu, una midida imprescindible pa garantizar la estabilidá del profesoráu, la calidá de la enseñanza y la dignificación de l’asignatura.

SUATEA insiste en que la reconocencia d’esta especialidá nun puede siguir retrasándose y esixe al máximu representante del Gobiernu asturianu que dea pasos firmes y efectivos pa responder a una demanda sofitada va munchu tiempu pola comunidá educativa y la sociedá asturiana.