SUATEA denuncia l’abandonu del CP Rey Pelayo y reclama la construcción inmediata de la Escuela Infantil 0-3

La dexadez institucional que vien sufriendo l’emblemáticu colexu del centru de Xixón choca col aumentu del 3,5% de financiamientu pa la concertada nos presupuestos d’anguaño.

SUATEA denuncia que la obra nel CP Rei Pelayo de Xixón ta teniendo un impactu directu na perda de matrícula del centru. Como datu especialmente significativu, pal cursu que vien namás hai una solicitú de preinscripción nel nivel d’Educación Infantil.

Depués del esbarrumbe l’edificiu en xineru del 2023, qu’obligó a treslladar al alumnáu y al profesoráu a otros centros, a la vuelta a les instalaciones hubo un compromisu de l’Alministración de que la obra diba tar pa febreru de 2025. Sicasí, a día de güei, la obra sigue ensin rematar.

L’actividá lectiva desenvuélvese nun contestu marcáu pola convivencia permanente cola obra, xenera munchos trestornos: munchu ruiu, povisa y suciedá, falla’l suministru d’agua, hai pocos baños, fallos lléctricos cada poco, y obliga a cambeos constantes na organización de los espacios. Estes condiciones afecten a la calidá del procesu educativu y a la salú llaboral del profesoráu.

Dende SUATEA considérase qu’esta situación ye consecuencia d’una planificación deficiente na execución de la reconstrucción del centru y ye imprescindible asegurar la construcción de la escuela infantil de 0 a 3 años que ta previsto facese na redolada del centru, como elementu estratéxicu para revertir l’actual enclín de perda de matrícula y garantizar el so futuru.

Por eso, SUATEA esixe a la Conseyería d’Educación:

• La finalización inmediata de la obra, garantizando condiciones afayaices pa que se desenvuelva l’actividá educativa.
• Dotación abondo de recursos, según les característiques y necesidaes del alumnáu.
• La planificación y execución, con plazos concretos y verificables, de la escuela infantil de 0 a 3 años vinculada al centru.