Uviéu dexa ensin almuerzu a 7 neños y neñes por nun llegar al mínimu establecíu pol contratu

SUATEA quier facer público que l’alumnáu solicitante del Colexu Públicu de Veguín va quedar el próximu cursu ensin serviciu d’almuerzu porque, a pesar de cumplir les families los requisitos establecíos nes bases reguladores, nun sumen la cantidá mínima de 12 estudiantes solicitantes. Esti númberu ye’l qu’alega’l mesmu consistoriu pa refugar la concesión de l’ayuda, atendiendo a lo establecío na so propia convocatoria, que dicta que “la beca de desayuno no podrá ser objeto de disfrute en caso de no alcanzarse la ratio mínima exigida para procederse a la prestación de dicho servicio, fijada en el contrato que rige el servicio de comedor escolar”.

Dende SUATEA entendemos que les 7 neñes y neños que demanden l’ayuda y que les sos families acreditaron les condiciones requeríes, nun pueden prescindir de la mesma porque la empresa axudicataria nun la considere rentable. Nun centru con una matrícula d’alredor de 30 alumnos y alumnes, esta cantidá supón casi una cuarta parte del alumnáu. Tamién queremos incidir na importancia del serviciu, per un llau porque la imposibilidá d’allegar al centru  primero qu’empiecen les sesiones de clase puede torgar la conciliación familiar y llaboral a munchos proxenitores (especialmente a munches muyeres que suelen ser les primeres en dexar los sos puestos de trabayu o amenorgar les sos xornaes). Per otru, porque les comíes planificaes y equilibraes son esenciales pal desenvolvimientu de los y les menores, para la so autonomía y el so bientar físicu y emocional, y pa la so educación en salú.

El conceyu d’Uviéu tien una responsabilidá para con tolos centros de la so dependencia que nun puede desoyer: da igual que se trate d’escueles grandes o pequeñes, del centru o de la periferia. La esternalización de servicios básicos como los comedores y el tresporte escolar trai como resultáu habitual la deficiencia del serviciu o inclusive, como nesti casu, la non prestación del mesmu. Por ello, encamentamos al Alcalde, al Conceyal d’Educación y Salú Pública y a la Conceyala d’Economía y Polítiques Sociales, a buscar soluciones a esti problema. Y repetimos una vegada más la posición del SUATEA: necesitamos servicios públicos, tresparentes, calidables, con garantíes pal personal y les persones usuaries.