SUATEA demanda un nuevu modelu de xestión de los comedores escolares

SUATEA valora la meyora del nuevu Real Decretu de comedores escolares y esixe un modelu públicu énte los defectos detectaos en Xixón y Uviéu

El Sindicatu Unitariu y Autónomu de Trabayadores de la Enseñanza d’Asturies (SUATEA) quier manifestar la so valoración positiva del recién Real Decretu sobro comedores escolares, que supón una meyora significativa na promoción d’una alimentación saludable nos centros educativos.

Esti nuevu marcu normativu reconoz la importancia de garantizar una dieta equilibrada pal alumnáu, non solo dende’l puntu de vista de la salú, sinón tamién como ferramienta educativa fundamental pa l’alquisición de vezos alimentarios afayadizos. Coles mesmes, nun podemos resalvar la dimensión social de los comedores escolares: pa munchos neños y neñes representen la única comida completa y saludable del día, lo que convierte esti serviciu nun pegollu básicu d’equidá y xusticia social.

Sicasí, esta declaración d’intenciones topeta frontalmente cola realidá que tamos viviendo en distintos conceyos asturianos. Les denuncies de recién en Xixón y Uviéu sobro la baxa calidá de los menús, l’usu d’alimentos d’escasu valor nutricional y la deficiente prestación del serviciu per parte de les empreses axudicataries ponen n’evidencia les graves faltes del modelu actual.

Como SUATEA vien denunciando dende va años, la esternalización del serviciu de comedores escolares derivó nun deterioru evidente de la calidá alimentaria. Atopámonos con comíes tresportaes, enfriaes mientres llargos periodos de tiempu, qu’en munchos casos pueden caltenese mientres selmanes. Esti tipu d’alimentación, claramente alloñada de los estándares de frescura y calidá, básase en productos ultraprocesaos que contradicen directamente los principios qu’agora recueye’l mesmu Real Decretu.

La lóxica empresarial de maximización del beneficiu económicu ye incompatible cola garantía d’una alimentación saludable y de calidá pal nuesu alumnáu. Nun puede dexase en manes d’empreses privaes un serviciu esencial qu’afecta de manera directa a la salú, al desenvolvimientu y a la educación de los nuesos fíos y fíes.

Nesti contestu, resulta especialmente relevante la próxima consulta pública impulsada pol Conceyu d’Uviéu pa la ellaboración d’un nuevu Reglamentu del Serviciu de Comedores Escolares. SUATEA va participar activamente nesti procesu presentando alegaciones en defensa d’un modelu radicalmente distintu al actual.

Dende la nuesa organización repetimos la nuesa posición histórica: los comedores escolares tienen de ser un serviciu públicu, xestionáu directamente pola Alministración. Defendemos un modelu basáu en cocines propies nos centros educativos, con ellaboración in situ de los menús a partir de materies primes fresques, de proximidá y de temporada. Esti sistema non solo garantiza una mayor calidá nutricional, sinón que tamién contribúi a la educación alimentaria del alumnáu y al desenvolvimientu del texíu productivu llocal.

Coles mesmes, consideramos qu’esti modelu públicu centralizáu podría ampliase pa dar serviciu a otros ámbitos sociales, como les escueles de 0 a 3 años o les residencies de persones mayores, optimizando recursos y garantizando una alimentación digno en toles etapes de la vida.

Creemos firmemente nos servicios públicos como garantía d’igualdá, calidá y control democráticu. Recuperar los comedores escolares como serviciu públicu ye la única vía pa cumplir realmente colos oxetivos marcaos pol nuevu Real Decretu y p’asegurar que l’alimentación del alumnáu tea percima de cualquier interés económicu.

Por too ello, SUATEA esixe a les alministraciones competentes un cambéu de modelu urxente que ponga fin a la privatización de los comedores escolares y apueste decididamente por un sistema públicu, dignu y saludable.