SUATEA saca un videu pola escuela pública con referentes de la cultura y el deporte

Dende SUATEA queremos anunciar la salida del videu “Nun faigas el pijo: escueyi la Pública”, nel que destacaes personalidaes de la cultura y el deporte d’Asturies animen a les families a matricular a les sos fíes y fíos na rede pública educativa asturiana. Esta iniciativa coincide cola apertura del periodu oficial d’almisión pal cursu 2026-2027, que se desendolca ente’l 14 y el 24 d’abril.

El videu va contar cola participación de reconocíes figures del ámbitu cultural y deportivu d’Asturies, cuya implicación refuerza’l compromisu colectivu cola educación pública. Trátase de Rodrigo Cuevas, Alicia Álvarez, Joaquín Pajarón, Beatriz Rodríguez, María Cotiello, Leticia Baselgas, Sara Lolo, Monchu Cerra y Miguel Fernandi. Toles elles apurren la so voz pa destacar la importancia d’apostar por un modelu educativu inclusivu, cercanu y de calidá.

El videu va espublizase na mañana del llunes 20 d’abril y va ser difundíu al traviés de tolos canales de difusión de SUATEA (Instagram, X, Bluesky, Facebook y YouTube), col oxetivu d’algamar al mayor númberu posible de families nesti periodu decisivu. Nel mesmu, xunto cola frase inicial “¡Nun faigas el pijo!”, añádese “pa les coses series, escueyi la Pública”.

Dende SUATEA reafitamos el nuesu compromisu cola defensa y promoción de la escuela pública asturiana. Animamos a les families a informase sobre’l procesu d’almisión y a escoyer una educación pública que garantice igualdá d’oportunidaes, atención a la diversidá de calidá y, en resume, un futuru más xustu pa tola sociedá.