Esta entrada está disponible en: Castellano (Castellanu)
SUATEA valora positivamente la disposición d’Educación a estudiar les propuestes de la Xunta de Personal Docente, ente elles trés iniciatives del nuestru sindicatu.
La Conseyería d’Educación amosóse favorable a treslladar al Ministeriu d’Educación la xubilación anticipada voluntaria a los 60 años pa tol profesoráu —una propuesta que pondría en condiciones d’igualdá al profesoráu perteneciente al Réxime Xeneral de la Seguridá Social col de Clases Pasives—, a negociar una regulación pa los permisos parcialmente retribuyíos del tipu «añu sabáticu» y un nuevu alcuerdu d’itinerancies. SUATEA celebramos que estes trés propuestes, que llevamos en xunu a la Xunta de Personal Docente, sían consideraes pola Alministración como «razonables y de xusticia».
Nel casu de les itinerancies del profesoráu, hai que recordar que l’alcuerdu actual ye del añu 2001, polo que’l cursu pasáu desenvolvimos una campaña reivindicando la so renovación. Amás de l’actualización de les indemnizaciones y del procedimientu pa solicitáles, y de la revisión de les rutes de dificultá especial, SUATEA solicita que se tengan en cuenta casos como’l del profesoráu que se mueve ente edificios alloñaos d’un mesmu centru, como asocede en colexos ya institutos de delles llocalidaes asturianes, o’l de quien realiza servicios que requieran desplazamientos habituales pa l’atención del alumnáu o del profesoráu.
Nel conceyu tamién s’abordaron la regulación de les actividaes complementaries y estraescolares y les retribuciones del profesoráu d’enseñances artístiques superiores, que van depender del desenvolvimientu de dellos decretos y reales decretos.
SUATEA celebra la efectividá de la xunta cola Conseyería d’esti órganu, que se va renovar próximamente tres les elecciones sindicales del 3 d’avientu.
Esta entrada está disponible en: Castellano (Castellanu)
SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
