Llistaos provisionales evaluación docente

Güei, vienres 17 d’abril, publícase en BOPA la Resolución na qu’apaez el llistáu provisional de persones almitíes y escluyíes na adhesión al Segundu Plan d’Evaluación de la Función Docente, progresión al tramu B o renuncia al tramu o plan.

Si ficiste alguna de les solicitúes anteriores yá puedes comprobar qu’apaeces nel llistáu equí.

Aprovechamos pa recordavos que na evaluación d’esti cursu, 2025-26, yá va tar vixente’l cambiu que permite la evaluación de les persones que tuvieren una baxa de llarga duración (a partir de 91 díes) a lo llargo’l cursu, como se firmó nel Pactu Asturies Educa. D’esta manera, como n’otros supuestos yá contemplaos anteriormente, estes docentes van poder ser evaluaes positivamente anque nun tuvieren incorporaes al so puestu de trabayu nel porcentaxe establecíu del periodu mínimu evaluable.

Magar esti avance que corrixe una inxusticia evidente del modelu d’evaluación, SUATEA afita la so oposición a esti sistema que discrimina al profesoráu con menos experiencia, qu’obliga a tener afitáu en primer tramu n’Asturies despreciando la experiencia n’otres comunidaes autónomes, que diferencia ente profesoráu de distintes etapes y que somete a la evaluación d’una serie d’ítems per parte del equipu directivu de cada centru. En SUATEA llevamos munchos años diciéndolo: nun queremos el Plan de Evaluación de la Función Docente. Queremos la superación d’esti modelu, como también recuye’l Pactu de desconvocatoria de fuelga. Como colectivu, queremos y merecemos cambios significativos: cuerpu únicu y subida llineal del suedu pa tol profesoráu.