Improvisando otra vegada na FP

Distintes informaciones treslladaes pol profesoráu de centros de FP n’Asturies apunten a una nueva midida adoptada pola Conseyería pa facer frente a les dificultaes derivaes de la implantación de la nueva llei de FP. Según estes comunicaciones, énte la falta de places n’empreses pa acoyer al alumnáu en formación, algamóse un alcuerdu, de calter retribuyíu, col Clúster TIC de Xixón.

Too apunta a que esti alcuerdu va consistir n’ufiertar al alumnáu afeutáu dos hores diaries de formación a distancia, permaneciendo’l restu de la xornada nel propiu centru educativu y trabayando en proyectos collaborativos al traviés de ferramientes dixitales como Teams, col oxetivu de “simular” un entornu empresarial.

Esta midida non solo vien ensin nengún tipu d’instrucciones, sinón que, amás, desconozse tanto l’encaxe pedagóxicu y normativu nel que se basa como les actuaciones pa la evaluación d’esta actividá per parte del profesoráu tutor. Too esto ta causando gran indignación y frustración nos centros.

Esta solución improvisada, confusa y ensin normativa clara que la avale, pon de relieve una vegada más la gran insatisfacción y inseguridá que’l profesoráu de FP vien sintiendo, y encaxa col que llevamos denunciando dende SUATEA dende que s’implantó la nueva Llei de Formación Profesional.