SUATEA esixe meyores qu’afecten a miembros de tribunal y a opositores

Acabamos de sacar un material col envís d’esixir una serie de meyores pa oposiciones qu’en SUATEA consideramos que son urxentes dende va munchu tiempu, tantu pa miembros de tribunal como pa opositores. 

Sobre les que afectan a les y los miembros de tribunal, destacamos cuatro:

• Retrasos nos pagos. Ye urxente cambiar la normativa pa que seya posible cobrar los servicios prestaos na siguiente nómina, y non esperar varios meses. 
• Cuantíes sin actualizar. Cola perda de poder alquisitivu que llevamos acumulada, nun puede ser que los miembros de tribunal cobren lo mesmo güei qu’en 2009. 
• Hores estra. Ye de xusticia que vocalíes, secretaríes y presidencies cobren más si faen hores estra (xornaes de +8 hores, y tamién fines de selmana). 
• Horariu. L’alministración tien de dar a les presidencies instrucciones que garanticen xornaes de trabayu razonables con descansos abondos. 

Pa opositores, esiximos lo siguiente:

• Criterios. Pa preparar bien l’esamen, lo xusto sería que los criterios tuvieren disponibles como mínimo dende que se publique la convocatoria del procesu en BOPA. 
• Repositoriu d’esámenes. El repositoriu actual ta mui desactualizáu. Urxe renovalu pa incluyir tolos esámenes de toles especialidades y tolos cuerpos, igual que n’otres CCAA. 
• Baremos. Publicación del baremu provisional con plazu abondu p’alegaciones. Les y los opositores nun pueden tar reclamando la mesma selmana del esamen. 
• Un nuevu Alcuerdu de Profesoráu Interín. L’Alcuerdu de 2014 ye’l culpable, por casu, de que seya obligatorio presentase en persona el día de la primera prueba escrita. Amás, solo lu firmaron dos organizaciones sindicales, polo que nun cuenta siquiera col respaldu de la mayoría sindical.