SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
L’autor presenta “Na escuela del capitalismu” (Hoja de Lata) n’Uviéu y Xixón.
Los resultaos del últimu informe PISA nun faen otra cosa que confirmar que les tesis de Hirtt dan nel clavu a la hora d’analizar los problemes actuales de los sistemes educativos.
L’escritor y ensayista belga Nico Hirtt va visitar Asturies los díes 27 y 28 de setiembre pa presentar Na escuela del capitalismu, escritu con Cécile Gorré, publicáu pola editorial Hoja de Lata, y que salió a la venta en tol estáu esti 21 de setiembre.
La visita ta organizada cola collaboración del SUATEA (STEs), organización sindical asturiana que’l próximu 2027 va celebrar el so 50 aniversariu, y va cuntar cola participación de Beatriz Quirós, compañera del sindicatu, expresidenta de la Xunta de Personal Docente asturiana y amás traductora de la edición española de la obra.
El primer alcuentru va ser el domingu 27 de setiembre, a partir de les 11:00 hores, nel marcu de la segunda edición de Pan y Roses, Festival de Lliteratura Social y Política d’Asturies, qu’entama la Dirección Xeneral d’Axenda 2030 del Principáu d’Asturies, y que se va celebrar en Kuivi Almacenes (c/ Almacenes Industriales, 40, Uviéu). Hirtt y Quirós van caltener un diálogu alredor de les principales cuestiones que se traten nel llibru.
La segunda cita va ser el llunes 28 de setiembre, a les 19:00 hores, nel Centru de Cultura Antiguu Institutu de Xixón (c/ Xovellanos, 21), onde se va facer una presentación de la obra Na escuela del capitalismu y na que tamién vamos tener lla presencia del autor y de la so traductora.
El llibru analiza la evolución de los sistemes educativos depués de más de dos décades de polítiques neolliberales y analiza los mecanismos polos que, según los sos autores, les esixencies del mercáu y de les empreses fueron teniendo un pesu creciente na educación. Ente les cuestiones que s’ atópense l’impactu de les nueves tecnoloxíes y de la intelixencia artificial, el desembarcu de les grandes empreses na Formación Profesional, la creciente privatización de los sistemes educativos y la situación de la enseñanza pública, incluyendo cuestiones rellacionaes cola so financiación y coles polítiques de sofitu a los centros privaos-alcordaos.
Pa SUATEA, la presentación del llibru produzse nun momentu especialmente relevante pa debatir el futuru de la educación pública, coincidendo con, d’una parte, la publicación de los resultaos del postreru informe PISA, y, d’otra, les recientes movilizaciones del sector educativu nel estáu español. Too ensin escaecer el 50 aniversariu de la constitución del SUATEA y los STEs, organizaciones que tienen la defensa de la enseñanza pública y la oposición a la privatización ente les señes d’identidá de la so trayectoria histórica.
Esta entrada está disponible en: Castellano (Castellanu)
