30 de marzu – Día Internacional de les Emplegaes Doméstiques

L’Asamblea Xeneral de les Naciones Xuníes (ONU) declaró en 1988 el 30 de marzu como’l día internacional de les trabayadores doméstiques. Esta fecha conmemorativa busca visibilizar, revalorizar y reivindicar los derechos llaborales del sector domésticu, qu’enfrenta altos niveles de precariedá, invisibilidá y riesgu d’abusos.

Datos INE

Según datos de la Encuesta de Población Activa (EPA), ellaborada pol Institutu Nacional d’Estadística, n’España trabayen aprosimadamente 550.000 persones nel emplegu domésticu. D’elles, unes 370.000 tán daes d’alta nel Sistema Especial d’Emplegaos Domésticos. Esto implica qu’ente un 30 % y un 35 % del emplegu domésticu ta en situación irregular.

El sector ta feminizáu enforma (95-97 % muyeres), la mayoría tien más de 45 años (60 %) y aprosimao un terciu son trabayadores estranxeres. Amás, ye un sector con alta informalidá y salarios per debaxo de la media.

Tocantes a la ocupación, los datos esactos varien según la fonte (EPA, Seguridá Social o estimaciones sindicales), porque muncho trabayu domésticu nun ta declaráu. Aprosimao, les emplegaes del llar afiliaes representen ente’l 1,8 % y el 2 % del total d’afiliación n’España. Esto implica que la mayor parte del emplegu domésticu realízase ensin cotización o n’economía somorguiada.

Por tanto, y teniendo en cuenta la tasa de paru femenín actual n’alredor del 12,5 %, esti sector rellaciónase enforma col paru femenín, porque munches muyeres entren nel serviciu domésticu cuando tienen dificultaes p’aportar a otros empleos.

Meyores

La Organización Internacional del Trabayu (OIT) aprobó en 2011 per primer vegada un conveniu (189) nel que se recoyíen los derechos básicos d’esti tipu d’emplegaes en materia d’emplegu, accesu a prestaciones, incluyida la cobertoria por maternidá, la llimitación  d’hores de trabayu, midíes contra l’acosu, violencia y abusos, y descansu selmanal de, siquier, 24  hores consecutives y pagu d’hores estres.

N’España, tres la so ratificación en 2022, equiparáronse derechos, esaniciando’l despidu por “desistimientu” y permitiendo l’accesu a la prestación por desemplegu. Impulsóse la necesidá d’iguar la llexislación interna p’ameyorar la prevención de riesgos llaborales y la protección énte’l despidu.

Igualmente, n’España, nos últimos años, produxéronse diversos adelantos en materia llaboral, el postreru al traviés del Real Decretu-llei 16/2022, de 6 de setiembre, pa la meyora de les condiciones de trabayu y de Seguridá Social de les persones trabayadores del serviciu domésticu.

Esti Real Decretu recueye ente delles de les sos midíes más importantes: la prestación por desemplegu a les emplegaes doméstiques; el derechu a una indemnización por desemplegu, que la so cuantía tien de ser equivalente al salariu correspondiente a doce díes per añu de serviciu, cola llende de seis mensualidaes o’l preavisu en casu d’estinción del contratu, a lo menos, de venti díes desque se-y comunique a la persona trabayadora, ente otres circunstancies.

Asina mesmo, el Real Decretu 893/2024, qu’entró a valir el 12 de setiembre de 2024 esixe evaluar riesgos llaborales nel serviciu domésticu familiar. Esta midida supón un pasu importante escontra la equiparación de derechos con otros sectores, históricamente negaos nel trabayu domésticu.

Sicasí, la so aplicación tamién evidencia qu’esta meyora ye, en parte, más formal qu’efectiva. La implementación recái en emplegadores particulares (families), lo qu’introduz un problema clave: la dificultá de treslladar obligaciones empresariales a una redolada privada. Esto xenera tensiones ente’l cumplimientu llegal y la capacidá real de los llares p’asumir estes responsabilidaes, tanto por desconocimientu como por falta de recursos.

Anguaño, entá nun se desenvolvieron elementos clave como formación específica, protocolos contra l’acosu o guíes técniques. Esto suxer que la política ta incompleta, lo que llinda’l so impactu real na meyora de les condiciones llaborales.

Esto implica qu’una parte importante de les trabayadores queda fuera de cualquier protección, polo que la midida, anque positiva, nun algama a quien más lo precisen.

La igualdá nun se decreta: garantízase

El problema yá nun ye la falta de lleis, sinón la falta de voluntá pa faceles cumplir. Ensin acción real, la dignidá de les emplegaes doméstiques va siguir siendo una delda pendiente. L’emplegu domésticu sigue siendo unu de los exemplos más claros de desigualdá de xéneru estructural nel mercáu llaboral. Anque nos últimos años reconociéronse derechos llargamente negaos, la realidá demuestra qu’estes meyores son, en gran midida, insuficientes mientres la mayoría de les trabayadores siga na economía somorguiada.

Nun basta con llexislar cuando cerca del 80 % del sector permanez fuera del sistema. Falar d’equiparación de derechos resulta una ficción. La falta de control efectivu, la dificultá d’aplicar la normativa nos llares y l’ausencia de midíes práctiques convierten munchos d’estos llogros en declaraciones formales ensin impactu real.

Amás, el calter fondamente feminizáu y precarizáu del sector evidencia que nun tamos solo énte un problema llaboral, sinón énte una cuestión de xusticia social y de xéneru. El trabayu domésticu sigue infravaloráu porque lu realicen mayoritariamente muyeres, munches d’elles migrantes, en condiciones d’escasa protección.

Por too ello, ye urxente pasar de la reconocencia simbólica a l’acción real: asoleyar l’emplegu ocultu, reforzar la inspección, facilitar el cumplimientu a les families empleagdores y dignificar social y económicamente esti trabayu esencial. Ensin voluntá política y midíes efectives, la igualdá va siguir siendo una promesa incumplida.