Retrasos nes baxes por riesgu llaboral durante l’embaranzu y doble discriminación pa interines

Nel conceyu del Comité de Seguridá y Salú d’Avilés, celebráu esta mañana, SUATEA treslladó la preocupación que nos fixeron llegar delles docentes asturianes sobre posibles retrasos na valoración de los riesgos llaborales durante l’embaranzu. El problema ye doble: per un llau, la concesión de los permisos ta retrasándose más de lo que venía siendo habitual. A esto súmase la situación treslladada por funcionaries interines, cuyos procedimientos se tramiten al traviés d’Ibermutuamur, que refieren tiempos especialmente prolongaos pa llograr el reconocimientu de la situación de riesgu durante l’embaranzu o la lactancia.

La situación de riesgu llaboral durante l’embaranzu nun ye una baxa por enfermedá. Cuando una docente comunica’l so embaranzu, tien d’entamase’l protocolu específicu de prevención (PSL7). A partir de la información apurrida pol centru y la trabayadora, el Serviciu de Salú Llaboral evalúa’l puestu y pue establecer midíes d’adaptación o, cuando estes nun sían posibles y nun esista otra alternativa compatible, recomendar la suspensión temporal de l’actividá llaboral a partir d’una determinada selmana de xestación.

SUATEA yá plantegó esti tema nos Comités de Seguridá y Salú del cursu pasáu y solicitó información sobre los tiempos efectivos de tramitación, pero l’Alministración manifestó entós que nun podía facilitar esos datos. La cuestión vuelve recoyese agora nos Comités de Salú Llaboral.

Depués del conceyu de güei, algamamos el compromisu per parte de l’Alministración de celebrar una xunta estraordinaria de los Comités de Seguridá y Salú, con calter monográficu, cola participación tanto de les mutues como del Serviciu de Prevención, y na que podremos treslladar dicha situación y esixir les meyores que sían necesaries.

Pa la nuesa organización ye fundamental conocer cuánto tiempu trescurre dende la comunicación del embaranzu hasta la evaluación del puestu, y si se ta retrasando la suspensión de l’actividá llaboral por riesgu, amás de los plazos específicos de los procedimientos xestionaos al traviés d’Ibermutuamur. Ye absolutamente inaceptable que, amás, les compañeres funcionaries interines tean doblemente discriminaes.