Ibermutua comprométese a revisar criterios pa la prestación por riesgu nel embaranzu

SUATEA deunció na reunión de los Comités de Seguridá y Salú la so esmolición pol retrasu na certificación y les diferencies ente funcionaries interines y de carrera, al recibir gran cantidá de consultes de profesores nesta situación. 

Esta mañana hubo una reunión na que participaron el Serviciu de Prevención de Riesgos Llaborales del Principáu d’Asturies, la mutua Ibermutua y les organizaciones sindicales con representación. La cita, impulsada pol Serviciu de Salú de la Conseyería d’Educación, respuende a la insistencia de SUATEA y otros sindicatos a lo llargo del cursu pasáu y el presente en conocer los criterios aplicaos y si ta habiendo un “endurecimientu” na considerancia de los riesgos pa la concesión de la llicencia o baxa por riesgu nel embaranzu a les docentes.

Dende SUATEA, llevamos meses solicitando datos de la selmana na que se concede la baxa por riesgu y la so evolución a lo llargo de los cursos. La información que nos tresmiten les docentes que realicen el Protocolu de Salú Llaboral 7 danos pensar que nun se tán teniendo en cuenta ciertos factores de riesgu y que les consecuencies son especialmente dañibles pa les funcionaries interines, que llogren la prestación selmanes más tarde que les fixes.

Na xunta tratáronse temes concretos como los riesgos que suponen la posibilidá de recibir golpes, la non inmunidá a ciertes enfermedaes o la itinerancia ente centros de trabayu. Quedaron de manifiestu les discrepancies ente los criterios a esti respectu qu’apliquen el Serviciu de Prevención públicu y les mutues, especialmente Ibermutua (que xestiona los casos de les docentes interines). Alcordóse realizar nueves xuntes nes que puedan contrastase y consensuar estos criterios.

Pa SUATEA ye importante que la concesión de les llicencies por riesgu nel embaranzu se faigan con toles garantíes: les docentes nun pueden dir trabayar con mieu, nun pueden depender de tener otros problemes de salú pa que se-yos conceda una baxa llaboral y nun pueden vese perxudicaes nel casu de nun ser trabayadores con plaza fixa. Pola calidá de la enseñanza y poles condiciones de trabayu más dignes y más xustes, vamos siguir peleando con toles docentes que compartieron con nós datos esenciales pa fundamentar les nuestres reivindicaciones.