SUATEA denuncia que se pieslle una unidá d’Infantil nel CP José Bernardo

SUATEA denuncia los recortes nel CP José Bernardo y reclama la reducción progresiva de los conciertos educativos

SUATEA concentróse esti vienres, 2 d’ochobre, delantre’l Colexu Públicu José Bernardo, en Sama, pa denunciar la supresión d’una unidá d’Educación Infantil al entamu d’esti cursu. El sindicatu alvirtió que recuperar una unidá pesllada ye bien difícil y reclamó midíes que garanticen la continuidá de la enseñanza pública.

Recórtase nun conceyu onde hai tres colexos concertaos d’un tamañu considerable. Hai cuatro años, SUATEA ellaboró un estudiu onde avisaba que caltener tantes unidaes concertaes nuna zona col declive demográficu de la cuenca’l Nalón yera insostenible. El sindicatu alvertía que, si nun se reducía la rede concertada, diben ser los centros públicos los que acababen soportando les consecuencies de la cayida de la natalidá.

La supresión de la unidá del CP José Bernardo confirma’l riesgu que se señalara daquella: zarrar unidaes públiques mentes se caltienen les concertaes conduz a un procesu de privatización pali que pali de la enseñanza na comarca. Aquella alvertencia cayó en sucu baxeru pa l’Alministración y tampoco recibió’l sofitu d’otres organizaciones sindicales. SUATEA llamenta que, cuatro años depués, les consecuencies d’esa falta de respuesta recayeren sobre la escuela pública.

Nun ye’l primer retayu que sufre esti colexu. El cursu pasáu yá se suprimió un puestu d’orientador, a pesar de la importancia de l’atención a la diversidá y de la detección temprana de les necesidaes educatives.

Con esta situación demográfica actual, SUATEA considera que la reducción y progresiva eliminación de los conciertos educativos ye l’únicu camín que permite garantizar la supervivencia de la escuela pública na cuenca del Nalón. Caltener la rede concertada mentes se recorta la pública supón avanzar nel desmantelamientu d’esta última y na privatización progresiva de la enseñanza na zona.