Puxa’l Primeru de Mayu, Día Internacional de la Clase Obrera

Ya s’avera otra vegada la conmemoración del Primeru de Mayu, Día Internacional de la Clase Obrera, col que recordamos a los mártires de Chicago, condergaos a muerte pola so llucha na defensa de reivindicaciones obreres como la xornada d´ocho hores. Comu ca añu, el Primeru de Mayu ye un bon momentu pa facer un balance de la situación de les clases trabayadores a nivel mundial.

L’añu pasáu atopámonos con una situación internacional que se cargara de tensión y denunciábemos que mos taba averando a una coyuntura na que’l peligru d’una guerra xeneralizada volvía a convertise nun escenariu posible. Desgraciadamente, esta situación siguió agravándose.

Siguimos teniendo dos graves conflictos en marcha, ún como consecuenci​a de la invasión d’un estáu soberanu pol otru vecín y l’otru como culminación d’un procesu de colonización que se desenvolvió hasta algamar niveles de xenocidiu. Lo más ablucante ye la desapaición del escenariu políticu d’organismos supranacionales y multilaterales que pudieren intervenir pa buscar tregües que faciliten l’entamu de procesos de negociación pa una solución pacífica de los problemes que xeneraron los enfrentamientos. Los poderosos decidieron que entidaes como les Naciones Xuníes (ONU) nun tienen nengún papel que xugar nestos conflictos.

Llevábamos delles décades ensín que les amenaces béliques algamaren un nivel de peligru como l’actual. Énte ello tenemos que repetir, alto y claro, que la guerra nun ye solución pa nengún conflictu. Que la clase obrera nun tien nenguna necesidá d’arriscar les sos vides pa defender los intereses de minoríes especuladores, corruptes y oligárquiques que viven a cuenta l’esplotación que garantiza esti sistema económicu favoratible, siempres, a los grandes capitalistes. Tamién tenemos de recordar que vamos impulsar la oposición a la militarización de los presupuestos del Estáu. Nin un euro más pa la industria l´armamentu, nin una vida más pa les guerres imperialistes. Convien recordar la esistencia dellos bloques imperialistes y que dengún gobiernu de los esistentes nel mundu satisface dafechu les aspiraciones emancipatories de la clase obrera.

Too esto asocede en mediu del torbellín xeneráu pola aplicación de polítiques neolliberales que tienen como oxetivu desmantelar les conquistes algamaes pola clase trabayadora tres décades de lluches pa defender unos derechos que mos dexen acceder a unes condiciones de vida dignes. Estos llogros concrétanse na esistencia de sistemes públicos de salú, vivienda, pensiones o educación, ente otros. El so orixe ta na necesidá de garantizar unes condiciones de vida saludables. Güei, la codicia de los grandes especuladores puso a los distintos sectores públicos nel centru d’unes polítiques que busquen acabar con ellos pa proceder al so progresivu desmantelamientu y privatización.

Una cosa queremos dexar clara: la crisis económica global que s’está xestando nun ye un asuntu nel que la clase trabayaora tenga dalguna responsabilidá. Sabemos que la responsabilidá recae nesa alianza de millonarios que aspira a gobernar el mundu a la so voluntá, por enriba de les necesidaes reales de la xente. Trátase de la mesma corriente que pon trabes pa dexar el poder cuando les eleiciones democrátiques nun-yos dan la mayoría que precisen pa caltenese nel mesmu. Ye la mesma corriente que cuestiona la necesidá de polítiques d’igualdá y non discriminación. La mesma corriente que prefiere poner en peligru la integridá del planeta primero que reconocer los riesgos ambientales y climáticos a los que la humanidá tien que facer frente cada día.

Nun somos equidistantes porque tenemos claro ónde tán los responsables de la deriva actual que padecemos a nivel internacional. Agora bien, esto nun significa que nun sepamos que’l mundu actual llegó a una situación estremo a partir de la xestión económica d’una élite que afonda nes desigualdaes pente’l norte y el sur del planeta, que fomenta la esplotación intensiva de los recursos naturales, que ye responsable de grandes desigualdaes que xeneren terribles fluxos migratorios y que danse el luxu de condenar a la miseria a continentes enteros.

Polo tanto, anunciamos la nuesa disposición pa refugar cualquier política que busque treslladar al conxuntu de la clase trabayadora sacrificios que nun mos correspuenden. Güei el mundu ta xestionáu por una serie de bloques que aplican siempres polítiques contraries a los intereses de los trabayadores y trabayadores. Polo tanto, la crisis del capital que la paguen los capitalistes.

Pola nuesa parte vamos siguir reclamando meyores nes nueses condiciones llaborales y de vida:

• Reducción de la xornada pa vivir un pocu meyor.
  
• Reducción de la edá de xubilación. Refugamos l’ampliación del periodu llaboral hasta los 67 años como fixo la reforma del añu 2011.
  
• Adopción de midíes pa poner fin a la precariedá llaboral con emplegos estables. Trespasar al sector públicu la directiva comunal qu´obliga a estabilizar al personal interín con más de tres años d’eventualidá. Fin al abusu la temporalidá.
  
• Garantizar les prestaciones sociales pa la población vulnerable. Por un verdaderu escudu social.
  
• Garantizar el funcionamientu de les pensiones públiques, rompiendo cola fenda de xéneru.
  
• Adopción de midíes económiques que ayuden a avanzar na transición ecolóxica que dexen llimitar los efeutos de la crisis climática.
  
• Planes de vivienda pública y control de los precios de los alquileres.
  

Agora más que nunca, unidá y movilización de la clase trabayadora

Énte la crisis sistémica que travesamos, énte les guerres imperialistes, la destrucción del planeta, la precarización de la vida y l’ofensiva contra los derechos sociales y llaborales, ye más necesariu que nunca organizase, xunir fuercies y pasar a la ofensiva. La clase trabayadora nun pue quedar a la espera mientres los poderosos consolidan el so dominiu a cuenta de la nuesa salú, el nuesu trabayu y les nueses vides.

Ye urxente reconstruyir les redes de solidaridá, fortalecer les estructures sindicales y populares, y articular una alternativa de rotura col capitalismu, basada na xusticia social, el feminismu, l’antirracismu, l’ecoloxismu y l’internacionalismu.

La llucha ye’l únicu camín. La hestoria amosónos que nada mos foi regaláu: too foi conquistáu con organización, llucha y determinación. Güei, como ayeri, el futuru va ser nuesu si nun nos resignamos y si convertimos el 1º de mayu non solo nuna xornada de conmemoración, sinón tamién nun día de combate, denuncia y esperanza colectiva.

¡Puxa la llucha de la clase obrera!
¡Puxa’l 1º de mayu!
¡Polos derechos de toos y toes, organízate y llucha!