SUATEA denuncia inacción de la Conseyería énte la falta de profesoráu en delles especialidaes de Secundaria

Uviéu, 25 d’abril de 2025 – El sindicatu SUATEA quier denunciar públicamente la grave situación que se ta viviendo en dellos centros educativos d’Asturies por culpa de la falta de cobertura de baxes docentes en delles especialidaes. Dende va selmanes, nun se tán cubriendo toles sustituciones con profesoráu interino inscrito nes llistes y bolses correspondientes, lo qu’afecta a asignatures clave como Matemátiques, Tecnoloxía, Llatín, Griegu (Cultura Clásica) y, dende esta mesma selmana, tamién Música.

Magar qu’hai persones disponibles nes llistes d’interinidá, les places nun tán siendo solicitaes. Les razones que pueden tar motivando esta falta de respuesta son diverses:

• La proximidá de les oposiciones, que lleva a munchos y munches aspirantes a centrase nel estudiu pa llograr una plaza fixa.
• Falta d’información o comunicación eficaz sobre les convocatories.
• Duración mui breve prevista pa delles sustituciones.
• Nel casu de Llatín y Griegu, hai bien poca xente nes llistes. Amás d’otros motivos, nun hubo voluntá política de faer un verdaderu procesu ambiciosu d’estabilización nel nuesu territoriu nestes especialidaes. 
• Nos casos de Matemátiques o Tecnoloxía, esiste una gran demanda llaboral nel sector priváu, con meyores condiciones salariales que na enseñanza pública.

La consecuencia direuta d’esta situación ye que cientos d’estudiantes lleven selmanes ensin recibir clases en delles materies, lo que constitúi una vulneración grave del so derechu a la educación. Como davezu, la repercusión nun foi mayor gracies al voluntarismu del profesoráu asturiano, que, en munchos centros, ta reorganizándose de forma interna pa que l’alumnáu nun quede completamente desatendío. Cónstamos que dellos departamentos tán redistribuyendo horarios pa dar clase n’hores llibres. Esta actitú ye ponderatible, pero nun ye razonable dexar un problema d’esta gravedá namás nes manes de la bona voluntá del profesoráu.

Dende SUATEA queremos alvertir de qu’esti problema nun ye namás un fechu puntual, nin atribuyible únicamente a una problemática de triba social. Ye tamién parte y consecuencia d’una planificación mal axeitada per parte de la Conseyería d’Educación, qu’aprueba plantiyes orgániques insuficientes, col votu en contra de toles organizaciones sindicales, y que s’apoya nun sistema de cobertura con personal interino, que representa yá un 25% del total del profesoráu.Llevamos tiempu alvirtiendo de les consecuencies d’esta situación y esixendo una solución estructural y consensuada cola representación sindical. La educación pública nun puede siguir funcionando con remiendos improvisaos que castiguen al alumnáu y precaricen al profesoráu. Dende SUATEA repitimos la nuesa disposición al diálogu, pero esiximos midíes urxentes y efectives per parte de l’Alministración.