Conseyería d’Educación engaña a les directores de la Red 0-3 años col calendariu

Ayeri xueves allegamos a una xunta en Conseyería d’Educación que solo se puede calificar de surrealista. De primeres, convocósenos a la mesma con menos de 48 hores d’antelación y ensin nenguna esplicación sobro l’únicu puntu del orde del día, nel qu’a cencielles figuraba “Escueles d’Educación Infantil. Calendariu escolar 2024-2025”. Una vegada ellí, atopamos con que la Dirección Xeneral de Centros, Rede 0-3 y Enseñances Profesionales propón un cambéu nel calendariu escolar de les escueles 0-3, que consiste n’incluyir trés díes non lectivos más. 

La realidá que se nieguen a asumir ye qu’esi calendariu escolar pa les escueles 0-3 de la Rede del Principáu solo afecta a les 26 directores que tán en comisión de serviciu exerciendo tala función, cuidao que, como ye bien sabíu por toes les madres y padres que faen usu de la rede 0-3 años, les técniques axusten el so propiu calendariu escolar con cada conceyu, colo que cada consistoriu ufierta’l so propiu calendariu escolar a los sos usuarios cada cursu escolar.

Alegase por parte de l’alministración que’l calendariu escolar nun s’axusta. Esta ye una verdá a medies: nun s’axusta por fallu de la TSXA en Asturies, pero sí que se fai n’otros territorios del estáu. 

SUATEA, na so vez de palabra, enfeó a les responsables de Conseyería que se nos convocara con asemeyáu baramentu y ensin detalle dalgunu de lo que se diba a informar. Amás, pidimos la paralización d’esti calendariu mientres anguaño con efectu inmediatu, de tala manera que siquier non se engañar a les persones qu’ostenten la dirección y l’añu que vien puedan escoyer si quieren o nun exercer esa comisión de servicios pero poniendo toles cartes enriba de la mesa, esto ye, esclariándo-yos que, si asumen el puestu, tienen que rexise pol calendariu llaboral y non pol escolar, que-yos correspuende como maestres funcionaries de carrera. 

Dicimos altu y claro, porque asina nos lo tresmitieron delles de les afectaes, que el directores de la rede 0-3 que s’atopen en comisión de servicios fueron engañaes: nun se-yos informó de la necesidá de cumplir un calendariu distintu al que-yos correspuende como maestres hasta finales d’ochobre, concretamente, dos díes antes del periodu de trés díes non lectivos establecíu nel calendariu escolar de tolos centros distintos a la rede 0-3. 

La opinión pública asturiana tien de conocer d’una vegada por toes la verdá: La Conseyería d’Educación nun tien plan B. Si les direcciones quédense ermes, va recurrir a personal interino pa cubrir. ¿De verdá vanse a arriesgar a que’l proyectu estrella de la Conseyería, –Les Escuelines-, quede ensin direcciones l’añu próximu?