SUATEA énte les sentencies del Tribunal de Xusticia de la Unión Europea

Esta entrada está disponible en: Castellano (Castellanu)

Les sentencies del TXUE – del 22 de febreru y 13 de xunu del 2024- almiten que la estabilidá ye una midida afayadiza pa sancionar a les alministraciones y desquitar al personal temporal víctima d’abusu na so contratación.

Los servicios xurídicos de les diverses organizaciones sindicales territoriales que formamos parte de la Confederación Intersindical tán analizando y valorando les posibles implicaciones de la última sentencia del TXUE, del 13 de xunu del 2024, nos asuntos C-331/22 y C-332/22, que respuende a diverses cuestiones prexudiciales plantegaes pol Xulgáu de lo Contenciosu Alministrativu Nº 17 de Barcelona, ​​sobre aspectos rellacionaos con distintos recursos del personal interín de la Función Pública catalana.  

Anque nun podemos adelantrar qué midíes concretes se van tomar hasta que’l Tribunal Supremu se pronuncie, sí que podemos constatar delles considerances del TXUE que sofiten, de manera inequívoca y contundente, los principios y llinies d’acción sindical que siempre defendimos:

    • La Llei 20/2021, del 28 d’avientu, de midíes urxentes pa menguar la temporalidá nel empléu públicu, promulgada tres el Real Decretu Llei 14/2021 del 6 de xunetu (“Icetazo”), y los procesos de estabilización que surden d’ella nun son una sanción al abusu na temporalidá. El TXUE vuelve repitir lo que yá alvirtiera na sentencia del 19 de marzu del 2020, Sánchez Ruiz y otros, a saber: esos procesos, que’l so resultáu ye amás inciertu, tamién tán abiertos, polo xeneral, a los candidatos que nun fueron víctimes de tal abusu.

    • Anque nun avala que’l personal interín n’abusu de temporalidá pase a ser directamente funcionariu de carrera como sanción, sí contempla que los tribunales de xusticia pueden establecer como sanción convertir la so relación de trabayu n’indefinida, siempre qu’esto nun implique una interpretación contraria a llei del Derechu internu (español). 

La nuestra Confederación Intersindical entiende qu’un gobiernu que se diz progresista tendría de ser el que dea una solución llexislativa al abusu de la temporalidá que restituya dafechu y ensin escepciones los derechos del personal que tuvo contratáu al so serviciu décades. Plantegamos: 

    • La necesidá de llexislar conforme a la Directiva 1999/70 pa xenerar figures nel nuestru derechu internu que dexen estabilizar persones y non places o puestos vacantes. D’esta manera evitaríase tener que xudicializar el procedimientu. Ye importante que les direcciones d’algunos sindicatos dexen de presionar al poder lexislativu pa enguedeyar l’espíritu de la Directiva 1999/70 y la xurisprudencia del TXUE, como asocedió nel alcuerdu del que salió la Llei 20/2021, de lo contrario vamos atopanos con otru despropósitu más y nun vamos poder establecer una solución xusta.

    • Les midíes llexislatives que s’aprueben tienen de restituyir los derechos de les víctimes del abusu de temporalidá nes mesmes condiciones, derechos y obligaciones que les del restu de personal fixo o funcionariu.

    • El sistema d’accesu a la función pública docente pela doble vía ye la solución xusta, porque estabilizae persones y non places.

La estabilidá llaboral ye’l puntal de los derechos llaborales y el principiu irrenunciable de la nuestra actividá sindical. Vamos lluchar por estos principios al  llau de les fuerces sindicales y plataformes que tean dispuestes.

Print Friendly, PDF & Email

Esta entrada está disponible en: Castellano (Castellanu)