Día Internacional pal Desaniciu de la Violencia Sexual nos Conflictos

Esta entrada está disponible en: Castellano (Castellanu)

De magar el 19 de xunu de 2015, conmemórase’l Día Internacional pal Desaniciu de la Violencia Sexual nos Conflictos col envís de concienciar sobre la necesidá de pone-y fin y honrar les víctimes y los sobrevivientes de la violencia sexual de tol mundu.

Esa data escoyóse porque nesi mesmu día de 2008 foi la primer vez que’l Conseyu de Seguridá de les Naciones Uníes condergaba la violencia sexual como táctica de guerra y como una torga pa la consolidación de la paz.

Como respuesta a la xuba del estremismu violentu, en 2016, diose otru pasu más reconociendo la violencia sexual como una táctica de terrorismu, afirmando que les víctimes de la trata y la violencia sexual cometíes por grupos terroristes habíen de ser elixibles pa la reparación oficial que se concede a les víctimes del terrorismu.

Les muyeres y les neñes representen, pelo menos, el 95% de les víctimes de violencia sexual documentada nes zones de conflictu en 2023, según datos de Naciones Uníes.

En territorios como Gaza, Ucraína, Etiopia, Colombia o Siria, por nomar dellos de los conflictos que continúen abiertos nesti momentu, les muyeres sufren violencies tales como violaciones sexuales, esclavitú sexual, matrimonios forciados, prostitución forciao, embaranzos y albuertos forciaos que constitúin un atendáu contra los drechos humanos y el drechu internacional d’ayuda humanitaria.

Por too ello, la Organización de Muyeres de la Confederación Intersindical denuncia que les muyeres sufrimos violencia en tol mundu pol fechu de ser muyeres, violencia que s’agrava nos conflictos.

Denunciamos tamién la total impunidá de los estaos y de los grupos criminales, que nos conflictos armaos cometen estos graves delitos contra la humanidá.

Dende la Secretaría de la Muyer del SUATEA y la Organización de Muyeres de la Confederación Intersindical pidimos la fin de los conflictos armaos y una especial proteición pa les muyeres y la reciella refuxaes, que tán en situación d’especial vulnerabilidá. Arriendes d’ello, exiximos que los organismos internacionales intervengan pa que los drechos humanos sían tamién drechos pa les muyeres, residan onde residan.

Pa conocer la realidá de les muyeres en zones de guerra animámosvos a participar nes conferencies qu’ufre esta selmana la periodista Patricia Simón, reportera internacional y escritora feminista. Tomái nota:

N’Uviéu: martes, 18 de xunu, a les 19:30h , nel Local La Llegra, c/ Postigu Baxu 40. Organicen: Conceyu Abiertu pola Paz, La Llegra y Asturies Feminista 8M.

En Xixón: miércoles, 19 de xunu, a les 19:00h, na Antigua Escuela de Comercio (2ª planta),  c/ Francisco Tomás y Valiente. Organiza: Asociación Ecofeminista Petra Kelly d’Asturies. Nesti casu participen tamién l’activista palestina Jaldía Abubakra y Gretel Villanueva, d’ACCEM Asturias.

Print Friendly, PDF & Email

Esta entrada está disponible en: Castellano (Castellanu)