SUATEA denuncia que’l cursu escolar entama con un abusu d’interinidá y medies xornaes

Dende SUATEA queremos amosar la nuestra fonda preocupación énte l’entamu d’un nuevu cursu escolar nel que, una vuelta más, repítense vieyes problemátiques qu’afeuten tanto a la calidá educativa como a les condiciones llaborales del profesoráu.

Ún de los aspeutos más graves ye l’abusu continuáu de la interinidá. El sistema educativu asturianu sigue apoyándose de manera desproporcionada nel personal interín, que representa un porcentaxe mui eleváu de les plantiyes: ún de cada cuatro docentes ye interín. Esta situación non solo precariza la llabor docente, sinón que tamién xenera inestabilidá nos centros y repercute negativamente na continuidá pedagóxica del alumnáu. Les promeses de reducción de la temporalidá siguen ensin materializase en midíes reales y efeutives, como vien denunciando sistemáticamente SUATEA. Estos datos siguen demostrando que los procesos d’estabilización fueron fallíos y que los problemes estructurales de les plantiyes orgániques repítense cursu tres cursu.

Igualmente preocupante resulta la proliferación de medies xornaes y el fraccionamientu de contratos, que condena a un ampliu sector del profesoráu a salarios insuficientes y a la imposibilidá de desenvolver la so llabor docente en condiciones dignes. L’usu recurrente d’estes medies xornaes ye una muestra de cómo la Alministración escueye aforrar a costi de los drechos llaborales, en cuenta de reforzar les plantiyes y garantizar una enseñanza de calidá. Centenares de docentes asturianos tán condenaos a trabayar lloñe de la so casa a media xornada, dexando gran parte del so sueldu en gasolina o alquileres.

En definitiva, esti entamu de cursu evidencia, una vuelta más, la falta de voluntá política pa facer frente dende la raíz a los problemes estructurales del sistema educativu. Dende SUATEA reiteramos la nuesa esixencia de que se tomen midíes urgentes pa reducir la interinidá, acabar cola precariedá de les medies xornaes y apostar por plantiyes estables que garanticen el drechu a una educación pública, de baldre y de calidá.