ISA y SUATEA sofiten les movilizaciones históriques del ciclu 0-3 n’Asturies y en tol estáu

Esti próximu xueves, 7 de mayu, tolos territorios del estáu van confluyir per primer vegada nuna fuelga estatal de la rede 0-3 años, baxo una reivindicación común: la dignificación d’una etapa educativa que ye esencial, pero que mientres demasiáu tiempu foi invisibilizada, precarizada y tratada como un serviciu asistencial.

Les escueles infantiles de 0 a 3 años formen parte del sistema educativu y cumplen una función clave nel desenvolvimientu integral de la infancia: nelles constrúin los primeros aprendizaxes, la socialización, l’autonomía personal y la detección temprana de necesidaes educatives. La fuelga del 7 de mayu ye una respuesta colectiva énte años d’abandonu institucional, na que se va esixir el desenvolvimientu d’una llei estatal específica que garantice de manera efectiva la reconocencia esclusiva del primer ciclu como etapa educativa, l’amenorgamientu de ratios, la implantación de la pareya educativa a tiempu completu, la equiparación del calendariu escolar al del restu d’etapes, la reconocencia profesional del colectivu y la dotación de recursos abondos p’atender la diversidá del alumnáu.

N’Asturies, lloñe d’avanzar nesta dirección, el procesu d’integración de les escueles infantiles de los conceyos y de los centros dependientes de Bienestar Social nuna rede pública autonómica ye un amiestu de procesos opacos, improvisación y alcuerdos ente alministración y sindicatos que nun dan cara a les reivindicaciones de la mayoría de la plantiya. El resultáu d’esta situación pa les trabayadores ye una situación permanente d’incertidume desque s’anunció’l proyectu “estrella” de l’anterior Conseyera, allá pel 2023.

Por si fora poco, la nuesa Conseyería d’Educación manifiesta nun entender por qué les educadores asturianes tán en fuelga, yá que, según la so versión, les reivindicaciones yá tán recoyíes no alcordao con UGT, CSIF y USIPA nun pactu de meyora de la futura rede autonómica.  Esta posición non solo demuestra una esmolecedora desconexón cola realidá del sector, sinón tamién una falta de respetu escontra el trabayadores, que lleven años denunciando les faltes del modelu. Si eses demandes tuvieren realmente garantizaes, nun esistiría’l nivel de conflictu actual, na que toles fuelgues convocaes n’Asturies tuvieron siguimientos históricos, nunca per debaxo del 80% de la plantiya.

La conciliación familiar y llaboral nun puede siguir sirviendo d’escusa para sobrecargar a les plantiyes nin pa desvirtuar el calter educativu del 0-3. La conciliación ye una responsabilidá pública que tien d’abordase con recursos y polítiques específiques fuera del ámbitu educativu. Convertir les escueles infantiles n’aparcamientos de neñes y neños supón un retrocesu tantu pedagóxicu como llaboral.

Dende Izquierda Sindical Asturiana y SUATEA –integrantes ambes de la Intersindical Asturiana– queremos dar tol nuesu sofitu a la llucha de el educadores asturianes y plantegamos, igual qu’elles, los mínimos que tendría de tener la rede autonómica:

• Una rede pública, gratuita, universal y ensin conciertos.
• Ratios que cumplan les recomendaciones de la Comisión Europea: 1 educadora cada 4 neños y neñes en 0-1; 1 cada 6 en 1-2 años, y una cada 8 en 2-3 años.
• Una plantiya estable y que garantice la pareya educativa: les baxes tienen de cubrise cola mesma inmediatez que nel restu d’etapes educatives.
• Inclusión de les TSEI na categoría llaboral que-yos correspuende, el grupu B.
• En resume, una rede dafechu integrada nel sistema educativu, con un calendariu escolar, condiciones llaborales homoxénees y garantíes reales pa toles profesionales.

Si Educación nun cambia’l rumbu y empieza a escuchar a la so plantiya, nun van consiguir más que siguir afondando nel deterioru d’unu de les pegollos fundamentales del sistema educativu. La defensa del mesmu esixe valentía, compromisu políticu, una inversión sostenida y, primero de too, respetu a les demandes de les trabayadores que lu faen posible.

Izquierda Sindical Asturiana y SUATEA llamamos a tola sociedá asturiana a acompañar a la plantiya de la rede 0-3 años na manifestación que va salir de la Estación de RENFE d’Uviéu, esti xueves, 7 de mayu, a les 6 de la tarde. Ye hora de demostrar con fechos y non con palabres que la rede 0-3 nun ye un recursu de conciliación, sinón la primer etapa de la rede educativa pública.