Retayos nel departamentu d’orientación del institutu de Ventanielles

Tamos na segunda quincena del mes de setiembre, van trés convocatories de personal interín y nel SUATEA siguimos recibiendo quexes de centros a cuenta la falta de personal, mientres el departamentu de comunicación de la Conseyería d’Educación presume d’inversión récord n’inclusión y atención a la diversidá, con titulares tan efectistas como “el Gobiernu d’Asturies refuerza’l papel de los orientadores y la inclusión”.

Hai 15 díes el SUATEA axuntó con responsables de la Conseyería d’Educación pa dar a conocer la realidá que ta sufriendo l’Institutu Pérez d’Ayala, nel barriu uvieín de Ventanielles, onde, amás d’otros retayos en distintos departamentos, pasa de tener dos orientadores a unu solu. Si’l cursu pasáu nel Departamentu d’Orientación yá se víen apuraos p’atender un centru nel que se calcula que más d’un 29% ye alumnáu vulnerable, podemos figuranos l’atención que se va a poder dar esti cursu con un retayu del 50% nel númberu d’orientadores. 

La falta de recursos sigue siendo la tónica xeneral na gran mayoría de los centros públicos asturianos, mentres que se sigue financiando a la rede privada-subvencionada. L’acción d’un gobiernu que presume de progresista tendría de centrase n’ayudar a los sectores que más lo precisen, lo cual inclúi a esos barrios populares onde nun lleguen otros recursos.