Día Internacional contra la esplotación sexual y la trata de persones

El 23 de setiembre de 2024 reivindicamos el “Día Internacional contra la esplotación sexual y la trata de persones” según estableció la Conferencia Mundial de Muyeres en Bangladesh.

Dende la Organización de Muyeres de la CI y la Secretaría de la Muyer del SUATEA, volvemos denunciar la trata de persones, sobremanera, de les muyeres y les neñes de 20 nacionalidaes distintes, que son mayormente les víctimes de la esplotación sexual nel nuestru país.  Según los datos del Ministeriu del Interior, producióse una medría de les víctimes d’esplotación sexual en 2023. La vulnerabilidá de munches muyeres y neñes na nuestra sociedá conviértenos nel blancu fácil de proxenetes y compradores d’actos sexuales. 

La trata de persones supon l’atentáu más grave contra la Declaración Universal de los Derechos Humanos y la so prevalencia nos sistemes xurídicos de los Estaos de Derechu del Mundu. Los seres humanos nacen llibres y iguales en dignidá y derechos y, dotaos como tán de razón y conciencia, tienen de portase fraternalmente los unos colos otros. La Constitución Española nun utiliza la espresión “llibertá sexual”, pero nel so testu garantiza una serie de derechos y principios fundamentales pa la igualdá énte la llei, derechu a la intimidá, acciones pa promover la llibertá yla igualdá, polo que toa persona tenía que tar amparada llegalmente y protexía énte los abusos o agresiones que se-y puedan causar pola so indefensión y vulnerablidá socioeconómica.

Sicasí, nun paez que los esfuerzos de l’Administración tean pensamos en lliberar a muyeres y neñes del xugu de la trata y la esplotación sexual. Según los datos del propiu Ministeriu, destínense prácticamente los mesmos recursos y medios institucionales añu tres d’añu, que prueben ser bien insuficientes pa terminar con esti mal qu’atenta contra los nuestros derechos fundamentales.

Dende la unidá social, y n’especial dende’l movimientu feminista, amás de sofitar y amosar sororidad coles víctimes de violencia de xéneru, muyeres  y neñes abusaes y violaes, madres discriminaes, muyeres cuidadores de familiares, profesionales qu’atopen con un techu de cristal, neñes apartaes de los estudios científicos, muyeres condenaes al trabayu de tiempu parcial y amenorgamientos de xornada, trabayadores de xeres mecániques propies d’enfermedaes llaborales y otres actitúes que nos suburdien y estremen de la igualdá real, tenemos que trabayar por consiguir una sociedá más xusta y segura por que nenguna situación económica, social o llaboral invisibilice a una muyer y la faiga esclava de la trata y ls esplotación, llueñe de la protección que precisa.

Los esplotadores sexuales tán en cualquier rincón del nuestru territoriu y en cualquier dimensión social, con un ánimu común de traficar y someter sexualmente a un ser humanu, apareyáu, na mayoría de los casos, a un arriquecimientu económicu. Como ciudadanos y cuidadanes, tenemos querefugar firmemente y ensin miramientos esta práctica, aplicando una política d’una tolerancia cero p’aquellos que creen que la esclavitú más antigua del mundu tien que ser perpetuada pal so beneficiu, facundo de menos el sufrimientu y la humillación qu’ello trai.

Per otru llau, les víctimes yá somorguiaes nesta espiral de violencia tienen d’atopar salíes reales con ayudes económiques, ayudes pal accesu a la vivienda, al empléu o a la formación y l’espedición de la so residencia temporal, nel casu de migrantes. Esti amparu normativu, ha dir acompañáu con una medría de penalización de los proxenetes y esplotadores. De nenguna manera, podemos blanquiar la so situación convirtiéndolos n’empresarios o en ciudadanos exemplares. 

Sirva esti día pa faer una fonda reflexón d’esta traxedia humana y la sociedá más solidaria y xusta que queremos pa toos y toes.