Los recortes lleguen a los CPRs

SUATEA denuncia les intenciones de la Conseyería de modificar, de forma unilateral, l’alcuerdu sobre condiciones de trabayu del profesoráu itinerante.

Apocayá los responsables de les Direcciones Xenerales de Personal Docente y d’Inclusión Educativa y Ordenación comunicaron a les direcciones de los Centros de Profesores y Recursos (CPRs), en reunión mantenida telemáticamente, la intención de nun reconocer la compensación horaria por itinerancia.

Esta compensación reconociérase na reunión de la Comisión de Siguimientu del Alcuerdu sobre condiciones de trabayu del profesoráu itinerante, fecha’l 19 de xunu de 2013, onde se decidió modificar l’Alcuerdu sobre condiciones de trabayu del profesoráu itinerante al serviciu del Principáu d’Asturies, de 14 de payares de 2001, col envís d’incorporar, nesi alcuerdu, al personal que cubre puestos de Dirección y Asesoría Técnico Docente na Rede de Centros de Profesores y Recursos (CPRs) del Principáu d’Asturies.

Los compañeros y les compañeres de los CPRs ven como la Conseyería d’Educación-yos fai de menos,  menaciando con esaniciar ensin xustificación nenguna derechos alquiríos y reconocíos na última década.

Esta decisión non solo empiora les condiciones llaborales del personal docente que trabaya nos CPRs, sinon qu’amás supón un agraviu comparativu col restu de profesoráu itinerante con destinu en centros educativos y, polo tanto, ye una decisión discriminatoria qu’incumple’l principiu d’igualdá.   

Si tenemos en cuenta les estorbises especiales que tienen los Centros del Profesoráu y Recursos, esta midida ye otru ataque y un pasu más hacia un debilitamientu y esmantelamientu a costafecha de los mesmos, favoreciendo a delles entidaes privaes qu’intenten, cuantayá, sorber y apropiase de los servicios públicos con fines monetarios.