Procesos Selectivos 2025 n’Asturies

Ayeri, llunes 2 d’avientu, tuvimos ocasión d’asistir a la reunión informativa sobre Procesos Selectivos 2025. Rescampla, pela parte positiva, el casu d’especialidaes onde, históricamente, nun salíen places a oposición, o salíen bien poques: Filosofía, Griegu, Llatín, Debuxu, Orientación Educativa, Instalaciones Electrotécniques, Procesos Comerciales o Procesos de Xestión Alministrativa. Amás, paeznos tamién mui positivo que se saquen 38 places de les diez especialidades que componen el cuerpu de Sectores Singulares de FP. Al aviesu, paeznos que salen mui poques places en especialidaes onde sabemos que falta profesoráu, como Informática, o en otres, como Economía, onde, pol nefastu Alcuerdu d’Interinidá que tenemos n’Asturies, va quitase al profesoráu d’estes llistes la posibilidá d’intentar acceder a una plaza n’otres especialidaes pa tener que disputase dos míseres places ente más de 200 persones. 

Destacamos también que la Conseyería fizo casu a dos reivindicaciones históriques del SUATEA: va valorase’l conocimientu de la llingua asturiana, tanto l’habilitación pa impartir asturianu o gallego-asturiano como la certificación oficial de la Conseyería del nivel de competencia llingüísta n’asturianu. Amás, va desapaecer la llectura de la prueba escrita pa introducir un sistema de pliques, reivindicación histórica del SUATEA, colo que los y les opositores nun van tener que dir a la sede a lleer les sos pruebes escrites, y va ser cada miembru del tribunal el que llea toles pruebes. La intención ye, primero, garantizar el mayor grau posible de confidencialidá y anonimatu, y segundo, evitar esi desplazamientu a los y les afectaes. 

Na parte más negativa, esmolécenmos abondo los cambios nel baremu, que se faen como consecuencia de los cambeos na normativa estatal, y que van na llinia del ataque al profesoráu interino perpetráu nos últimos años. Por si fuera pocu, aumenta’l pesu de la esperiencia llaboral si vienes de la enseñanza privada-subvencionada (la mal llamada concertada). 

Tamién valoramos negativamente la parte del baremu que sí depende de la alministración asturiana. Nun nos parez de recibu que vaya a resultar prácticamente imposible llegar al máximu de puntuación nel apartáu 3 (“otros méritos”), teniendo en cuenta qu’apenes naide n’Asturies va poder aportar un C1 en Competencia Dixital, mientres n’otros territorios sabemos que ye bien fácil acceder a esi nivel de certificación, polo que vamos a asistir a un grave agraviu comparativu. 

Pa rematar, anque nos allegra que por fin se reconozan los títulos d’Asturianu y Gallego-Asturiano, oponémonos a la so minusvaloración al facelo nel apartáu III, “otros méritos”. Dende SUATEA reivindicamos que se valoren nel apartáu II “formación académica” n’igualdá coles otres llingües.