Firmáu el Pactu Asturies Educa, frutu de la presión del profesoráu

Güei, un representante de SUATEA participó nel actu de firma del Pactu Asturies Educa, nome col que l’Alministración bautizó l’acuerdu de desconvocatoria de fuelga tres el conflictu entamáu el pasáu mes de mayu.

La nuesa valoración inicial ye de moderada satisfación. Per una parte, valoramos mui positivamente la primer apuesta real pola inclusión d’esti Gobiernu, al traviés d’una inversión presupuestaria seria en personal docente (contratación de 150 PT y 150 AL en plantía orgánica). Amás, recuéyense meyores nes ratios, un plan de desburocratización, aumentu salarial pa compensar la falta d’equidá del actual plan d’evaluación docente y reducción de la xornada llectiva pa mayores de 55 años a desenvolver nos próximos 3 cursos, ente otres munches midíes, que lleguen hasta 38. Podéis consultar l’alcuerdu completu na nuestra web.

Coincidimos col presidente Barbón en qu´esti acuerdu ye un pasu importante nel camín de meyora y fortalecimientu y tien de sirvir como puntu de partida, y nin muncho menos ye’l final de ná. Sicasí, yá advertimos a la señora Ledo y al so equipu de que s’equivocaríen si piensen que los asuntos trataos equí pueden dase por zarráos.

En SUATEA tenemos perclaro que l’enseñanza pública asturiana necesita una inversión muncho mayor pa atayar les debilidaes estructurales que vien sufriendo nos años caberos. Y, como llevamos faciendo práuticamente dende los nuesos entamos, tenemos que insistir una vuelta más en que nun pue haber enseñanza pública de calidá ensin abrir d’una vez el “melón” de los conciertos educativos. Namás un plan ambiciosu pa acabar progresivamente con esti sistema inxustu y segregador mos va permitir aseguramos la capacidá presupuestaria pa siguir avanzando nesta trayeutoria de refuerzu de la escuela pública.

Agora toca vixilar el so cumplimientu y instar al equipu de la Conseyera a buscar un impulsu pa la so ampliación nos cursos vinientes. Nun mes ta previsto que entame la negociación d’una de les primeres midíes: el nuevu Decretu d’Equidá. Insistimos en que mos equivocaremos si consideramos esti Acuerdu como daqué distintu a lo que debería ser: el puntu d’entamu de cambeos más fondos pal profesoráu asturianu, y la constatación de que ensín financiación nin negociación nun pue haber polítiques educatives de calidá.