IES Roces: Conseyería nun puede siguir mirando pa otru sitiu

Dende SUATEA reafirmámonos nes denuncies feches y aprovechamos p’agradecer les aportaciones y l’apoyu que nestos díes tamos recibiendo per parte de munchos y munches docentes que conocen de primer mano la realidá del IES Roces de Xixón. Asina, queremos matizar que la evaluación de riesgos psicosociales de fines del cursu 2024/25 a la que facíemos referencia nun comunicáu anterior nun ye más que la confirmación d’una llarga tradición de práctiques autoritaries que se vienen aplicando na última década nesti centru.

Pue apreciase nos concursos de tresllaos, principalmente nos autonómicos, la inestabilidá de la plantiya. Analizando los datos que nos ufierten les axudicaciones de los últimos años, tanto les de los mencionaos concursos como les d’interninidaes, ye habitual que’l profesoráu con plaza nel centru se vea obligáu a concursar pa intentar cambiar de destín y que’l personal interín, si puede, decida nun continuar nel mesmu. Consideramos un fracasu de l’alministración educativa que, tres d’un informe como’l citáu, nun se tean implementando midíes qu’encaren el mal clima de trabayu qu’obliga al profesoráu descontentu a escapar del so puestu. La realidad ye que pasen los cursos y sigue habiendo una sangría na plantiya.

Velar pola salú mental de los y les trabayadores ye fundamental pa xenerar un ambiente beneficiosu, tanto pa ellos y elles como pal restu la comunidá educativa. Nun se pue ignorar una evaluación de riesgos na que’l profesoráu describe un centru con una carga mui elevada de trabayu, alta demanda psicolóxica y falta d’apoyu, asina como un fuerte control per parte del equipu directivu, qu’acaba xenerando conflictos davezu. Mientres esti equipu directivu insiste en que ta intentando resolver un problema que vien d’atrás, nosotros siguimos constatando que la falta de comunicación y la verticalidá formen parte del día a día. En vez d’intervenir con normalidá nos claustros o durante les visites sindicales, el profesorado tien llegao a pidir la realización d’asamblees fuera’l centru.

Desiximos al Serviciu d’Inspeición Educativa y a la Conseyera d’Educación que nun miren pa otra parte y pongan solución al problema.