¿Por qué la fuelga del 18 de xunu tamién pal personal interino d’Educación?

¿Quién convoca?

Convoca la Confederación Intersindical y SUATEA contra’l “Plan Iceta” de supresión de les interinidaes  y pol afitamientu d’empléu del personal qu’anguaño ta trabayando n’abusu de la contratación temporal.

• Una fuelga contra’l Plan Iceta”

El ministru de Política Territorial y Función Pública acaba de dar a conocer el so plan p’ amenorgar les tases de temporalidá nel sector públicu, modificando para ello l’artículu 10 del Estatutu Básicu del Emplegáu Públicu (EBEP). L’oxetivu ye amenorgar en trés años esa tasa per debaxo de 8% (agora, n’Educación, la interinidá n’Asturies asítiase en redol al 35% de la plantiya, siendo la metá d’esos puestos a media xornada). Amenorgar esa tasa va obligar a toles Alministraciones a sacar a Ufierta Pública d’Empléu toles places que tean siendo ocupaes por personal interino mientres trés años siguíos. Pa forzar a les Alministraciones a esti amenorgamientu de la interinidá va recurrir a la supresión mientres un añu enteru de toes aquelles places que, cumpliendo estes condiciones, nun sían cubiertes por personal funcionario de carrera o nun pasen a la correspondiente OPE. Suponse qu’esta midida ye disuasoria o sancionadora pa l’Alministración, pero quien realmente van cargar coles consecuencies de l’ausencia de cobertoria va ser el restu del personal n’activu nel correspondiente serviciu, según la ciudadanía, que va cuntar con una emplegada o emplegáu menos.

• ¿Por qué’l Ministru Iceta propón esti cambéu nel EBEP?

La sentencia del 19 de marzu del Tribunal de Xusticia de la Unión Europea dio un duru golpe a los procesos de oposición (OPEs) de les distintes Alministraciones Públiques, determinando que nun son sanción al abusu de la contratación temporal. Esta sentencia ye, poro, una llamada d’atención al poder lexislativu estatal pola so falta de transposición íntegra y de desenvolvimientu normativu internu de la Directiva 1999/70/CE del Alcuerdu Marco de la CES, la UNICE y el CEEP sobro’l Trabayu de Duración Determinada y pa la non discriminación ente trabayadores y trabayadores indefiníos y temporales.

L’abusu de temporalidá» na contratación del personal público produzse cuando’l empleador (la Administración) nun convocó en plazu’l procesu selectivu (art. 70 EBEP), y, según indica la sentencia del TJUE de 19 de marzu, cuando s’utilicen nomamientos temporales pa necesidaes permanentes (estructurales), tanto si esiste xuna concatenación de nomamientos o contratos, como si se produció un ónico contratu o nomamientu.

La cláusula 5a del Alcuerdu Marco esixe a los Estaos miembros qu’adopten midíes pa prevenir l’abusu de la temporalidá, y nel so casu, la protección al trabayador/a cuando esistiera tal abusu. Pa la Confederación Intersindical, la sentencia del TJUE alvierte que:  nin los procesos selectivos de llibre concurrencia, nin el tresformamientu del personal temporal ya interín n’indefiníu non fixu son la solución; nenguna d’estes midíes garantiza la protección del personal público que sufrió abusu de la temporalidá.

• ¿Qué midíes tomaes hasta la fecha?

Los sindicatos CCOO, UXT y CSIF adoptaron una llínea pasiva y continuista de los alcuerdos pa la meyora del empléu público con una alministración abusadora y al marxe de dictaŕmenes del Tribunal de Xusticia de la Unión Europea y del Parlamentu Européu. Y paez que siguen la llínea, que yá manifestó el ex-ministro Cristúbal Montoro en 2017, d’asumir les posibles indemnizaciones que dicten los xulgaos, obligando a xudicializar el problema colos costos y desincentivos qu’ello trai. Y, sobremanera, creemos que independientemente de lo que resuelvan los tribunales, les indemnizaciones nun solucionen el problema de forma xusta.

• ¿Cuála tendría de ser la solución?

A falta d’un desenvolvimientu lexislativu estatal, solo ye posible atopar una solución equitativa promoviendo una verdadera consolidación, y eso pue conseguise convirtiendo al personal temporal contratáu en fraude de llei en personal funcionario por analoxía col artículu 15 del Estatutu de los Trabayadores, como rixe nel Sector Priváu, o bien  al traviés d’una regulación lexislativa que regule un concursu de méritos acutáu o, poques gracies,  cualesquier fórmula que pueda axustase, pero que conduza al mesmu oxetivu: CONSOLIDAR al personal qu’anguaño ta trabayando n’abusu de la contratación temporal.

Por eso, dende la Confederación Intersindical y los STEs-i entendemos que se deben sustituyir los dos alcuerdos soscritos a nivel estatal, de 2017 y 2018, por otru marcu regulatoriu qu’acabe cola actual precariedá del personal interino y que nun aportune nel abusu de contratación temporal. Ye necesario emburriar pa la negociación colos partíos políticos con oxetu de promover una regulación lexislativa acordies cola Directiva, que facilite la verdadera consolidación de los/les trabayadores en fraude de Llei, non solo de les places qu’ocupen, pus el problema foi causáu puramente polos incumplimientos llegales de les Alministraciones Públiques. De la mesma, permitirá evitar el colapsu xudicial causáu poles demandes de cientos de miles de persones afectaes que demanden la reconocencia del so abusu y reclamen la consolidación nos sos puestos ocupaos mientres años, inclusive décades.

• ¿Afecta esti plan a tol personal interino?

Sí, porque toles places vacantes que vienen ocupando van ufiertase primero nel concursu de tresllaos y, si nun se cubren per esta vía, van sacase a ufierta pública d’empléu. De nun faelo, la vacante va suprimise pa tol añu completu.

• ¿Pa cuándo ta previsto que s’amenorgue per debaxo del 8% la tasa d’interinidá?

Tien que tar amenorgada primero que termine l’añu 2024.

• Dellos medios publicaron que’l tiempu máximu que puede ser una persona interina van ser trés años. ¿Ye verdá?

Ye incorrectu afirmalo asina, pero nun se dieron esplicaciones al respeutu. A los trés años, la plaza va salir a oposición si nun se cubrió por una persona funcionaria de carrera.

•  ¿Va Siguir el personal interino con más de trés años en llistes y va poder solicitar otra vacante? Anque nun hai seguridá, pue que sí; pero esto llévanos a la entruga siguiente.

• ¿Va haber abondes vacantes?

Evidentemente non, porque toles places estructurales (les que lleven trés años o más funcionando) tienen que tar, o bien cubiertes por personal definitivo, o tienen d’ufiertase n’oposición, o  van suprimise mientres un añu. Si l’oxetivu ye baxar al 8% la tasa d’interinidá, y n’Asturies tenemos un 35%, na práctica va suponer que les 2200 vacantes completes qu’agora ocupen persones interines de tolos cuerpos docentes, van quedar amenorgaes a unes 550.

• ¿Puede la Conseyería d’Educación evitar que se supriman vacantes estructurales ensin tener qu’ufiertales nunes oposiciones?

Sí, pero con muncho curiáu, porque nel cambéu del EBEP faise una mención espresa a que cualquier actuación irregular va dar llugar a la esixencia de responsabilidaes a l’autoridá en materia de personal de cada Alministración. Esisten mecanismos alternativos pa saltar esta obligación; pero por aciu fórmules que xeneren más precariedá: podrá tresformase la naturaleza de bastantes places qu’hasta agora yeren vacantes estructurales y tresformales en necesidaes eventuales; asina s’torgaríase tener qu’optar ente OPE o supresión de la plaza. Esto conduznos la siguiente entruga.

• ¿A qué otra figura alternativa puede recurrise  pa nun definir como vacante una plaza y asina nun tener qu’ufiertala a oposición o suprimila?

En munchos casos, podrá recurrise a lo que nel EBEP nomen“sustitución transitoria de los titulares”. El problema sería que toes estes places qu’antes teníen tratamientu de vacantes van pasar a ufiertase como sustituciones,  y les condiciones llaborales pueden ser más precaries, con nomamientu a lo más hasta’l 30 de xunu, etc. Y tou ello derívanos a dos entrugues finales.

• ¿Qué va pasar col sistema de regulación de llistes d’interinidá que tenemos n’Asturies?

Dende SUATEA va años que venimos esixendo un nuevu Alcuerdu d’interinidá que nun suponga la rotación nel empléu y que garantice la estabilidá. Si’l Plan Iceta sigue alantre, va añedir torgues pa llograr un sistema más garantista porque les vacantes sacaríense a oposición o tresformaríense en sustituciones.

• ¿El Gobiernu nun prevé dalgún mecanismu transitoriu pa facilitar de dalguna manera l’accesu a la función pública de los interinos ya interines que yá lleven años trabayando?

Hasta’l momentu nun fixo nengún xestu que nos lo faiga prever. El plan nun ye estabilizar a les persones, ye a cencielles estabilizar les places esaniciando la interinidá tal que la conocíemos hasta agora. Ye verdá que l’actual EBEP yá recueye mecanismos escepcionales que seríen la solución pal colectivu interín que lleva muncho tiempu nel sistema (artículu 61.6); pero la so aplicación implicaría la implementación d’una llei específica, y eso rique una voluntá política non manifestada hasta agora.