Oposiciones: Los datos al detalle desdicen al Conseyeru

OPOSICIONES: LOS DATOS AL DETALLE DESDICEN AL CONSEYERU

Énte les declaraciones del Conseyeru d’Educación del pasáu 9 de setiembre rellacionaes colos resultaos de les oposiciones celebraes n’Asturies esti branu, dende SUATEA, tres un estudiu fonderu de los resultaos de toles especialidaes convocaes, queremos añedir lo siguiente:

Ufiertábense un total de 450 places y llograron plaza 396 persones. El Conseyeru afirmó qu’aprobaron 336 interinos y, analizaos los datos, consideramos que ye una afirmación demasiao xeneral qu’almite interpretación. El nuesu estudiu afirma qu’el 53% de los aprobaos tienen poca esperiencia: el 21%, nenguna esperiencia o menos de 1 añu; el 32%, ente 1 añu y 8 d’esperiencia. El restu, esto ye, el 47% de los aspirantes tienen 8 o más d’esperiencia. Poro, nun ye verdá qu’estes oposiciones facilitaren mayormente l’accesu del profesoráu interín, ye más, les oposiciones supunxeron en delles especialidaes que munchos interinos quedaren ensin trabayu de resultes de la rebaremación de les llistes tres les oposiciones.

Per otra parte, llama l’atención que quedaren ermes 54 places en delles especialidaes, destacando Matemátiques (13 places), Hostelería y Turismu (9), caltenimientu de Vehículos (10), etc. Efectivamente, esto asocedió n’otres CCAA y hai que faer analís pormenorizáu de les causes. El conseyeru fai referencia a qu’ún de los motivos puede ser que nesti modelu d’accesu les distintes pruebes son eliminatories. Ensin dulda, esa ye una de les principales causes y, precisamente pa torgalo, la mayoría d’Organizaciones Sindicales presentes na Mesa sectorial de Madrid propunximos na negociación llevada a cabu’l cursu pasáu que les pruebes nun fueren eliminatories, pero’l Ministeriu d’Educación fue autoritariu y nun fixo casu a la nuesa propuesta.  Amás, hubo otros factores qu’enzancaron el procesu y que los aspirantes denunciaron, como la escesiva complexidá de les pruebes práctiques, o que los criterios de valoración y calificación fueren enforma xenerales y los aspirantes nun sabíen a qué atenese, o  la imposibilidá de revisar esames tres la primer prueba.

Demostróse que’l modelu d’accesu a la función pública docente en vigor nun val y que ye imprescindible revisalu de forma urxente, esto ye, primero que se convoquen les oposiciones al cuerpu de Maestros que se van celebrar el próximu añu. Por ello, dende los Stes-i demandamos al Ministeriu d’Educación que reabra la negociación d’un nuevu sistema d’accesu de forma inminente.

Uviéu, a 10 de setiembre de 2018